Հայաստանի Քարախաչի լեռնանցքում 200 ՄՎտ ընդհանուր հզորությամբ խոշոր հողմակայանի կառուցումը նախատեսվում էր սկսել դեռ 2010 թ. և 2 տարում այն հանձնել շահագործման: Նախագիծն իրականացնում է հայ-իտալական «ԱՐԷՆԵՐՋԻ» ընկերությունը: «Առաջին լրատվական»-ի հետ զրույցում ընկերության տնօրեն Գագիկ Բաղդասարյանը հայտնեց, որ կայանի կառուցմանը հիմնականում խոչընդոտել են համաշխարհային ֆինանսատնտեսական ճգնաժամը և արտարժույթի փոխարժեքի տատանումները:
«Քարախաչի հողմակայանի նախագծերն ամբողջությամբ պատրաստ են, ունենք նաև լիցենզիա առաջին հերթին 20ՄՎտ հզորությամբ կայանի կառուցման համար: Սակայն վիճակը զգալիորեն վատացավ 2008 թ. դրամի կտրուկ արժեզրկման, հետևաբար և դրամով ամրագրված սակագնի նվազման պատճառով: Ճիշտ է, վերջերս սակագինը մի փոքր բարձրացել է, բայց դեռ բավարար չէ: Նաև համաշխարհային ճգնաժամի արդյունքում Իտալիայի վիճակն է վատացել»,- ասաց Գ. Բաղդասարյանը:
Նա նշեց, որ ներկայում աշխատում են նախագիծն էժանացնելու ուղղությամբ: Մասնավորապես, նախապես որոշված 3 ՄՎտ-անոց տուրբինների փոխարեն այժմ որոշվել է 2ՄՎտ-անոց բերել: Դա կդյուրինացնի նաև տեղափոխումը, և լոգիստիկ խնդիրները կլուծվեն: Ամեն դեպքում նախագծի արժեքն ընդհանուր առմամբ նույնն է մնալու՝ 1 Մվտ-ի կառուցումը կարժենա 1.5 մլն եվրո:
«Հուսով եմ, որ մոտ ապագայում առկա խնդիրները կլուծվեն: Մենք ստիպված կլինենք լիցենզիան մի քիչ երկարաձգելու, բայց ի վերջո կկառուցենք կայանը»,- ասաց Գ. Բաղդասարյանը՝ հավելելով, որ եթե այս տարի սակագների հարցը լուծվի, հնարավոր է 1 տարվա ընթացքում արդյունք լինի. «2013-ին պետք է աշխատացնեինք: Այժմ հուսով ենք՝ 2014-ի կեսերին կլինի»:
Հիշեցնենք, որ նախագծի առաջին փուլի իրականացման արդյունքում կառուցվելիք 20 ՄՎտ-անոց կայանը տարեկան կարտադրի շուրջ 50 մլն կՎտ/ժամ էլէներգիա: Նախատեսված է նաև 200 ՄՎտ հզորությամբ ենթակայանի և 55 կմ երկարությամբ 110 կՎ բարձրավոլտ գծերի կառուցում: Նախագծի երկրորդ փուլի իրականացման արդյունքում, երբ կկառուցվի ընդհանուր 200 ՄՎտ հզորությամբ հողմակայանը, համարժեք կլինի ածխաթթու գազի արտանետումների տարեկան ավելի քան 200 հզ. տոննայով կրճատման:
