Այսօր լրագրողների հետ հանդիպմանը Հայաստանի քաղաքագետների միության (ՀՔՄ) նախագահ Հմայակ Հովհաննիսյանը խոսեց այն մասին, որ իշխող ուժն իրենց նկատմամբ պարբերաբար ճնշումներ է գործադրել, սակայն իրենք այդ ճնշումներին երբևէ «տեղիք չեն տվել և չեն էլ տալու»:
Նա պարզաբանեց, որ դեռևս հունվար ամսին Սարյան 33 հասցեում գտնվող ՀՔՄ գրասենյակի վերևի 2 հարկերը զբաղեցնող «Հայէներգոինստիտուտի» բաժնետոմսերը ձեռք գցած Սենիկ Ջուլհակյանն իրեն դիմել էր հանդիպման համար, ինքն էլ համաձայնել էր․ «Ես համաձայնեցի՝ մտածելով, որ բարերար մարդ է և մտադիր է փրկել «Հայհիդրոմետը» ծանր վիճակից, այնինչ հետագայում բոլորովին այլ բան պարզվեց, և ես մերժեցի նրա առաջարկը, որից հետո ես ստացա գրություն, որ եռօրյա ժամկետում ազատեմ տարածքը, քանի որ կապիտալ վերանորոգում էր իրականացվելու: Հակառակ դեպքում՝ իրենք կդիմեն համապատասխան մարմինների»:
Ապա Հմայակ Հովհաննիսյանը նշեց, որ այդ ամենից հետո փորձել է պարզել, թե իրականում ով է, Սենիկ Ջուլհակյանը։ «Պարզվեց, որ «Եվրոէներգո» համակարգ գոյություն չունի Չեխիայում, ինչի անունից հանդես էր գալիս Ջուլհակյանը։ Զարմանում եմ, թե ինչպես կարող էր կառավարությունը տարածք օտարել մի անձնավորության, ով հայտնի է, որպես մեքենայություններով զբաղվող և կասկածելի անցյալով ձեռներեց»,– ասաց Հովհաննիսյանը:
Ի դեպ, վերջինիս հավաստմամբ՝ մարտի 1-ին կառավարության որոշումով ինստիտուտի 1900 ք/մ տարածք օտարվել է Սենիկ Ջուլհակյանին, որի դիմաց նա իբր 1 մլն դոլար է վճարելու, մինչդեռ իրականում նա ոչինչ էլ չունի: Հմայակ Հովհաննիսյանի համար անհասկանալի է մնում, թե կառավարությունն ինչու է հենց մարտի 1-ին ընդունում նման որոշում: Խոսելով իր հետագա քայլերի մասին, Հովհաննիսյանը նշեց, որ ինքը որևէ խնդիր չունի. եթե մեկը ոտնձգություն կատարի իր հանդեպ, կստանա իր արժանի հակահարվածը:
