Արագածոտնի մարզում «Ժառանգության» և «Ազատ դեմոկրատներ»-ի միասնական թիմն այցելեց Թալին քաղաք, որտեղ նրանց դիմավորեցին թալինցիներն ու թիվ 15 ընտրատարածքում առաջադրված պատգամավորության թեկնածու, նախկին քաղբանտարկյալ Մկրտիչ Սափեյանն ու նրա եղբայրը՝ նախկին քաղբանտարկյալ Ժորա Սափեյանը:
«Ազատ դեմոկրատներ» կուսակցության նախագահ Խաչատուր Քոքոբելյանը ողջունելով թալինցիներին` նկատեց. «Երբ Թալին մտնելով տեսա մեր ընկերներին` մի պահ հուզվեցի: Ինձ մոտ տպավորություն կա, որ 88-ին Օպերայի հրապարակ եկածներս դեռ այնտեղ ենք, դեռ փողոցներում ենք, դեռ պայքարի ամենաթեժ կետերում ենք, և մեծ հպարտությամբ կարող եմ ասել, որ այդ պայքարը համալրվել է տոկուն երիտասարդներով»:
Քոքոբելյանը նկատեց, թե «Ազատ դեմոկրատներ»-ի և «Ժառանգության», ինչպես նաև հասարակական սեկտորի միասնական ավելի ուժեղ հանդես գալու հանգամանքն այս ընթացքում շատ է քննարկվել, տարաբնույթ մեկնաբանություններ են եղել, բայց իրենք միշտ նշել են ու այժմ էլ նշում են, որ իրենց քաղաքական կամքը, իրենց վճռականությունը բավարարեցին` ցույց տալու համար, թե ինչպես կարելի է լինել միասնական: Քոքոբելյանը նաև հավաստիացրեց, որ այդ միասնությունն ավելի է մեծանալու, ու շատերն են իրենց միանալու:
«Այսօր իմ և մեր բոլորի հիմնական նպատակը Հայաստանի Հանրապետության քաղաքացու խնդիրների լուծմանը հասնելն է: Այսօր հայաստանցին ստիպված լքում է իր երկիրը և իր բարօրությունը որոնում այլ երկրում: Մենք միշտ պայքարել ենք, որպեսզի ՀՀ քաղաքացին ստիպված չլինի փոխելու իր երկիրը, մենք փոխելու ենք իշխանությունը, որպեսզի մեր քաղաքացիները արժանապատիվ ապրեն սեփական երկրում»,- ընդգծեց Քոքոբելյանը` հավելելով, որ 91թ. սկսած` երբեք ժողովուրդը սխալ ընտրություն չի կատարել, ժողովրդին խաբելը հեշտ չէ. այլ հարց է, որ իրենց չի հաջողվել պահպանել իրենց վստահած քվեն. «Մենք վստահ ենք, որ այս անգամ միասնաբար հանդես գալով` ՀՀ-ում ներդնելու ենք նոր քաղաքական մշակույթ, թույլ չենք տալու ՀՀ քաղաքացուց խլել իր երջանկությունը»:
Մենք գտնվում ենք, մի այնպիսի տարածաշրջանում, որտեղ արդեն ապրելը հաղթանակի նշան է. եթե այսօր այս քարքարոտ լեռնաշխարհում թալինցին կարողանում է իր հացը վաստակել և ամուր կանգնել իր հողի վրա, դրանից մեծ հայրենասիրություն չկա:
Խաչատուր Քոքոբելյանը թալինցիներին կոչ արեց ձայն տալ Մկրտիչ Սափեյանին. «Թալինում առանձնահատուկ երջանիկ պատահականությամբ այնպիսի իրավիճակ է ստեղծվել, որ թալինցին մաքուր հոգով ու սրտով ընտրություն անելու հնարավորություն ունի, դժբախտաբար` ոչ բոլոր մեծամասնական տարածքներում է քաղաքացիներին այդ հնարավորությունը տրված: Մկրտիչ Սափեյանի պարագայում թե թալինցին, թե երևանցին և թե Հայաստանի ցանկացած անկյունում գտնվող խիղճ ունեցող քաղաքացին շահագրգիռ պետք է լինեն, որ նա հայտնվի խորհրդարանում: Մարդ, որը զենքով պաշտպանել է իր հայրենիքը և իր մտքով ու իր վճռականությամբ պաշտպանել քաղաքացիական դիրքորոշումն ու ժողովրդին»:
Նա նաև կոչ արեց առանց վարանելու ընտրել ամենաճիշտ, ամենահաղթական տարբերակը՝ Րաֆֆի Հովհաննիսյանի գլխավորած միասնական ցուցակը, որը երբեք կանգ չի առնելու:
