«Ժառանգություն» կուսակցության պատգամավոր Անահիտ Բախշյանը թեպետ բնակվում է Մալաթիա-Սեբաստիա վարչական շրջանում, սակայն Շենգավիթ ու Էրեբունի համայնքները ներառող թիվ 12 ընտրատարածքում որոշել է մեծամասնական ընտրակարգով առաջադրվել՝ ապացուցելու, որ այնտեղ իրեն վստահող ընտրողները բավական մեծ թիվ են կազմում: Այս մասին նա հայտարարեց Քաղաքական և միջազգային հետազոտությունների հայկական կենտրոնի՝ այսօր կազմակերպած քաղաքական բանավեճի ժամանակ:
«Բացի այդ, մեծամասնական ընտրակարգով առաջադրվելով՝ ես, նախ, ցանկանում եմ կոտրել այն կարծրատիպը, որ այդ ընտրակարգով ընտրված միակն կին պատգամավորը կարող է լինել Հրանուշ Հակոբյանը: Մեծամասնականով առաջադրվելուս երկրորդ նպատակն է ցույց տալ, որ որոշ օլիգարխներ ոչ մի օր ԱԺ աշխատանքի չներկայանալով՝ տարեկան մոտ 3 միլիոն 800 հազար դրամ աշխատավարձ են ստանում:
Խորհրդարան գալով՝ ես շարունակելու եմ անցած հինգ տարիներին սկսած օրենսդրական բոլոր նախաձեռնություններս, մասնավորապես` կրթության ոլորտին վերաբերող»,- նշեց նա:
Նշենք, որ թիվ 12 ընտրատարածքում առաջադրված մյուս թեկնածուները՝ ԲՀԿ-ական Լյովա Խաչատրյանը, ՕԵԿ-ական Ռոբերտ Մասումյանը, ՀՅԴ անդամ Կառլեն Գևորգյանը և ՀԱԿ ներկայացուցիչ Տիգրան Տեր-Պետրոսյանը բանավեճին չէին ներկայացել:
