«Ժառանգություն» կուսակցության նախընտրական ծրագիրը, որը հետագայում վերածվելու է հետընտրական ծրագրի, միտված է լինելու երկրում իրականացվող բարեփոխումներին. այսօր լրագրողների հետ հանդիպմանը ասաց «Ժառանգության» պատգամավոր Ստեփան Սաֆարյանը:
«Հայաստանում առկա վստահության դեֆիցիտը հետևանք է վատ կառավարման: Մեր «Նոր Հայաստան» ծրագիրը գալիս է փաստելու, որ ոչ թե մարդն է պետության համար, այլ պետությունը՝ մարդու, որ մարդը պետք է հայտնվի քաղաքականության կենտրոնում, ու պետությունը պետք է ծառայի քաղաքացուն: Պետությունը պետք է դուրս բերվի անձնակենտրոն կառավարման համակարգից:
Մեր նպատակն է արմատապես փոխել քաղաքական կառավարման համակարգը: Միայն սա կարող է բերել իրավիճակի բեկումնային փոփոխության: Ծրագրում մեր թիրախում է հայտնվել նաև փոքր ու միջին բիզնեսը խեղդող մենաշնորհը»,- ասաց Սաֆարյանը:
Նա մեկ անգամ ևս շեշտեց՝ անհիմն են որոշ շրջանակների պնդումները, թե «Ժառանգությունն» ու «Ազատ դեմոկրատները» ծայրահեղ բևեռներում են և չեն կարող համագործակցել:
«Հիշեցնեմ, որ մենք երկուսս էլ գտնվում ենք աջ կենտրոնամետ հատվածում, ինչը նշանակում է, որ մերժում ենք ծայրահեղ լիբերալիզմն ու ինդիվիդուալիզմը»,- ասաց պատգամավորը:
Ասուլիսի մյուս բանախոս` «Ժառանգություն» կուսակցության մամուլի քարտուղար Հովսեփ Խուրշուդյանն էլ իր հերթին հավելեց, որ տնտեսության բոլոր ոլորտները քվոտայավորված են:
«Հիմնական ոլորտները մենաշնորհված են, ինչն անթույլատրելի է»,- նշեց նա՝ հղում կատարելով կուսակցության նախընտրական ծրագրի տնտեսական հատվածին, որի գործադրումն էլ կարող է շտկել ստեղծված իրավիճակը:
