Գիտնականներն ասում են, որ կյանքի վերաբերյալ դրական պատկերացումներն օգնում են առողջ սիրտ ունենալ:
Daily Mail-ը գրում է, որ ըստ գիտնականների, լավատես մարդիկ սրտի կաթված ստանալու 50 տոկոս ավելի քիչ հավանականություն ունեն:
Նախկինում արված հետազոտությունները ցույց են տվել, որ բացասական էմոցիաները, ճնշվածությունը, բարկությունը, անհանգստությունը կամ ատելությունը կարող են ազդել սրտի վրա:
Իսկ Հարվարդի համալսարանի պրոֆեսորների այս նոր հետազոտությունը ցույց է տվել, որ հոգեբանական առողջությունը կարող է օգնել սրտի առողջությանը:
Հետազոտության հեղինակ Ջուլիա Բոհեմն ասել է, որ «բացասականի բացակայությունը դրականի ներկայություն չէ»: Ինչպես նշել է գիտնականը, իրենք պարզել են, որ լավատեսությունն ու ուրախությունը նվազեցնում են սրտի հիվանդությունների առաջացման հավանականությունը՝ անկախ մարդու տարիքից, սոցիալ-տնտեսական դիրքից, մարմնի քաշից և անգամ նրանից՝ մարդը ծխում է, թե՝ ոչ:
