Նորվեգացի ահաբեկիչ Անդերս Բրեյվիկը, ով մեղադրվում է 77 մարդու սպանության մեջ, դատարանին պատմել է եվրոպական այլ երկրների ազգայնականների հետ իր կապերի մասին: Այս մասին ապրիլի 18-ին գրել է The Guardian-ը:
Բրեյվիկը հայտարարել է, որ ահաբեկչությունների ոգեշնչման աղբյուրն առաջին հերթին սերբ ազգայնականներն են, որոնցից մեկի հետ ինքը ծանոթացել է 2002 թվականին: Բրեյվիկը հրաժարվել է իր համախոհի անունը նշել, սակայն ոստիկանությունը կարծում է, որ խոսքը հատուկ նշանակության ջոկատի նախկին հրամանատար Միլորադ Ուլեմեկի մասին է, ով կազմակերպել էր Սերբիայի վարչապես Զորան Ջինջիչի սպանությունը: Իշխանությունները դեռ ապացույցներ չունեն, որ Բրեյվիկը և Ուլեմեկը հանդիպել են:
Բրեյվիկի ոգեշնչման աղբյուր է եղել նաև «Ալ-Կաիդա»–ն: Բրեյվիկը հայտարարել է, որ իսլամիստական ցանցի մեթոդները կարող են օրինակ ծառայել եվրոպական ազգայնականների համար:
Նեոնացիստների «հին դպրոցի» գաղափարախոսությունը, ըստ Բրեյվիկի, իրեն հոգեհարազատ չէ:
Բրեյվիկը նշել է նաև, որ Նորվեգիայում գոյություն ունի ահաբեկչական երկու միավորում, որոնք «ցանկացած պահի» կարող են հարձակվել հակառակորդի վրա:
Չնայած հետաքննողների սկեպտիցիզմին՝ Բրեյվիկը շարունակում է պնդել, որ ինքը հակամուսուլմանական տամպլիերների ուխտի ասպետ է: Մասնավորապես նա նշել է, որ 2002 թվականին մասնակցել է Լոնդոնում տեղի ունեցած տամպլիերների փակ նիստին:
Բրեյվիկին սպառնացող դատավճիռը, որով նախատեսվում է 21-տարվա ազատազրկում, Բրեյվիկը «խղճուկ» պատիժ է անվանել:
«Դուք մահապատի՞ժ կցանկանայիք»,- մեղադրյալին հարցրել է դատավորը: «Ոչ, սակայն այդ որոշումը հարգանքի արժանի կլիներ»,- պատասխանել է Բրեյվիկը:
