Բրիտանական Financial Times թերթի փոխանցմամբ՝ այս տարի Իրանը նավթի արտահանումից կվաստակի 56 միլիարդ դոլար: Այսպիսի կանխատեսում է արել Լոնդոնի Գլոբալ էներգետիկ հետազոտությունների կենտրոնը:
Վերջինիս կանխատեսմամբ՝ նավթի բարձր գները Թեհրանի համար կմեղմացնեն ԱՄՆ-ի ու ԵՄ-ի սահմանած իրանական նավթի ներկրման վրա բեռնարգելքի հետևանքները: Չնայած նրան, որ այդ պատժամիջոցների պատճառով Իրանը 1/3-ով կրճատելու է իր նավթի արտահանման ծավալը՝ նա կստանա իր նավթային արդյունաբերության պատմության ընթացքում ածխաջրածինների վաճառքից ստացված երրորդ խոշորագույն շահույթը:
Շվեյցարական «Փեթրոմաթրիքս» էներգետիկ քոնսալթինգային ծառայության ղեկավար Օլիվեր Ջեյկոբը հայտարարել է, որ Իրանի դեմ սահմանված պատժամիջոցները չեն գործում. «Բնականաբար այդ պատժամիջոցները վնաս են հասցնում Իրանին, քանի որ նա ստիպված է կրճատել նավթի արտահանումը: Սակայն դա փոխհատուցվում է նավթի բարձր գներով, քանի որ Արևմուտքն ի վիճակի չէ վերահսկել դրանք»:
Լոնդոնի Գլոբալ էներգետիկ հետազոտությունների կենտրոնի կանխատեսմամբ՝ արևմտյան պատժամիջոցների հետևանքով Իրանից ածխաջրածինների օրական մատակարարման ծավալն այս տարի կնվազի մինչև 600,000 բարելի: