ԲՀԿ անդամ Վարդան Օսկանյանը տեղյակ է և ցավալի է համարում, որ նախընտրական քարոզարշավի շրջանակներում Հայ ազգային կոնգրեսի ներկայացուցիչների նկատմամբ բռնութան դեպքեր են գրանցվում: Այս մասին նա ասաց Հանրային վերահսկողության շտաբի աշխատանքների վերաբերյալ այսօր կայացած քննարկման ժամանակ:
«Նման դեպքերը պետք է հնարավորինս շուտ դատապարտվեն ու կանխվեն, քանի որ այդ ամեննն ի վերջո ստվեր է գցելու ընտրությունների արդարացիության և մեծ հաշվով՝ նաև արդյունքների վրա: Եթե որևէ պատգամավորության թեկնածուի աշխատանքներ խոչընդոտվում են, նշանակում է՝ հավասար պայմաններ չկան:
Միաժամանակ, այս բոլորը կլինի մեր շտաբի ուշադրության կենտրոնում, հավանաբար նաև հայտարարություն կլինի: Կարծում եմ՝ իրավապահ մարմինները շատ արագ պետք է զբաղվեն նմանօրինակ գործերով և իրենց գնահատականը տան:
ՀԱԿ անդամների հանդեպ բռնությունները միայն 7-րդ ընտրատարածքի խնդիրը չեն: Հանդուրժողականությունն այս ընթացքում շատ կարևոր է, և ուրախ եմ, որ հանրապետության նախագահը նման կոչեր է անում: Բայց այս պահի դրությամբ դրանք կարծես թե արհամարհվում են:
Բոլորի համար պետք է հավասար պայմաններ լինեն, որպեսզի հասարակությունը այլընտրանքի հնարավորություն ունենա և ճիշտ որոշում կայացնի: Միայն այդ ժամանակ կարող ենք ազատ ու արդար ընտրությունների արդյունքում այնպիսի խորհրդարան ունենալ, որին հասարակությունը կվստահի:
Արձանագրենք, որ բոլոր այս տարիներին վստահության դեֆիցիտ է եղել, որն ազդել է ԱԺ հեղինակության ու աշխատանքների վրա»,- ասաց Օսկանյանը:
Հարցին՝ ինչպե՞ս կգնահատի ՀՀԿ այն հայտարարությունը, որ Հանրային վերահսկողության միասնական շտաբը ձևական բնույթ է կրում, ՀՀ նախկին արտգործնախարարը պատասխանեց.
«Մենք մեր աշխատանքով ցույց կտանք, որ շտաբի ստեղծումը ժամանակի հրամայականն է և ձևական բնույթ չի կրում: Ավելի կարևոր խնդիր, քան ազատ ու արդար ընտրությունների անցկացումն է, մեր առջև իսկապես չկա: Հայաստանի հաջորդ հինգ տարվա ապագան կախված է այս ընտրություններից: Չեմ ուզում նախապաշարվել ու թևաթափ լինել՝ ասելով, որ ամեն ինչ ավարտված է: Ոչ, ամեն ինչ նոր է սկսվում»:
Վարդան Օսկանյանը չցանկացավ մեկնաբանել մեկ այլ հարցի, թե ինչո՞ւ է ԲՀԿ առաջնորդ Գագիկ Ծառուկյանը զենքով գնում հանրահավաքի:
«Իհարկե, տեսել եմ դա, բայց չեմ ուզում մեկնաբանել: Ես կարծում եմ՝ դրանից չպետք է մեծ բան սարքել: Եթե օրինական իրավունք ունես զենք կրելու, դա քո իրավունքն է: Դա պարոն Ծառուկյանի իրավունքն է. նկարներից դատելով՝ դա իրոք զենք էր»:
Հաջորդ հարցին՝ ինչպե՞ս կմեկնաբանի փաստը, որ նախընտրական քարոզարշավի ընթացքում ԲՀԿ-ն գյուղացիներին տրակտորներ է բաժանում, և արդյոք դա ընտրակաշառք չէ՞, Օսկանյանը պատասխանեց.
«ԲՀԿ-ն ու Գագիկ Ծառուկյանը բարեգործական ակցիաներ արել են մշտապես: Մի բան, որ արվել է, պետք է շարունակի արվել: Կարծում եմ՝ սրա մեջ միայն ու միայն դրական բան պետք է տեսնել»:
Լրագրողներից մեկն էլ հետաքրքրվեց՝ ինչպե՞ս է վերաբերվում այն փաստին, որ ՀՀԿ-ն իր ցանկացած հայտարարությանը բավական բուռն է արձագանքում:
«Ես չեմ մեկնաբանում այդ բոլորը: Իրենց պետք է հարցնեք՝ ինչո՞ւ են իմ ելույթները ցավով ընդունում: Ես քննադատում եմ այն, ինչ կարծում եմ, որ սխալ է արվել: Այնպես որ, ինձ համար բացարձակ նշանակություն չունի՝ ինչ արձագանք է լինելու: Ցավալին միայն այն է, որ բովանդակային հարցադրումներին բովանդակային պատասխաններ չեն տրվում, այլ անձնական վիրավորանքներ, և ես չեմ արձագանքելու դրանց»,- ասաց ԲՀԿ անդամը:
Ամփոփելով՝ Օսկանյանը ընդգծեց, որ չի ուզում մեկնաբանել «Ժառանգություն» կուսակցության փոխնախագահ Ռուբեն Հակոբյանի այն հայտարարությունը, թե ՀԱԿ-ն ու ԲՀԿ-ն փորձում են նոր կոալիցիա ստեղծել:
