Իսրայելի իշխանությունները չորեքշաբթի ազատ են արձակել պաղեստինցի բանտարկյալ շեյխ Հադեր Ադնանին, որը 65 օր հացադուլ էր անցկացնում իր վարչական կալանքի դեմ: Այս մասին հաղորդում է RIA Novosti-ն՝ վկայակոչելով «Իսլամական ջիհադ» խմբավորման մամուլի ծառայությանը:
Վարչական կալանքի պայմանների համաձայն՝ Իսրայելի իշխանությունները կարող են անորոշ ժամանակով, առանց դատարանի որոշման, բանտ նստեցնել այն պաղեստինցիներին, որոնց վտանգավոր են համարում պետության համար:
Նախկին բանտարկյալ, 33-ամյա Հադեր Ադնանը, որը նախկինում բազմիցս ձերբակալվել էր Իսրայելի ուժայինների կողմից, դադարեցրել է բողոքի ակցիան այն բանից հետո, երբ իշխանությունները խոստացել են ապրիլի 16-ին նրան ազատ արձակել:
Տեղի ԶԼՄ-ների հաղորդմամբ՝ «Իսլամական ջիհադ» խմբավորման անդամ Հադեր Ադնանին հայրենի գյուղում դիմավորել են Պաղեստինի պաշտոնատար անձինք և հարյուրավոր մարդիկ:
