1989 թվականից սկսած՝ ամեն տարի ապրիլի 17–ը նշվում է որպես Հեմոֆիլիայի համաշխարհային օր: Ըստ առողջապահության նախարարության տվյալների՝ հեմոֆիլիայով հիվանդների թիվն աշխարհում 400 հազար է: Արյան մակարդման ժառանգական հիվանդություններից 92-95 տոկոսը կազմում են հեմոֆիլիաները՝ A, B, C և վիլլեբրաբդի գործոնի անբավարարությունը:
Հեմոֆիլիայի կենտրոնում ներկայումս կա այդ հիվանդությամբ տառապող 236 մարդ, որից 57-ը երեխաներ են:
«Հեմոֆիլիան ժառանգաբար փոխանցվող և բավական ծանր ընթացող հիվանդություն է: Այն ունի մի շարք տարատեսակներ, բայց հատկապես տարածված են A, B, C խմբի հեմոֆիլիաները»,- այս մասին «Առաջին լրատվական»-ի հետ զրույցում ասաց արյունաբան Անահիտ Զախարյանը:
Ըստ մասնագետի՝ Հայաստանում տարածված է հեմոֆիլիա A-ն, որը 8-րդ գործոնի անբավարարությունն է. «Այդ գործոնի պակասն առաջացնում է արյան համակարգում լուրջ շեղումներ, որի հետևանքով արյունն ընդհանրապես չի մակարդվում: Քանի որ ժառանգական հիվանդություն է, ապա կարող է դրսևորվել ինչպես վաղ տարիքում, այնպես էլ՝ ավելի ուշ: Այսօրվա դրությամբ այն համարվում է անբուժելի հիվանդություն»:
Այն հարցին, թե արդյո՞ք այս հիվանդությամբ տառապում են միայն տղաները, Զախարյանը պատասխանեց. «A և B տեսակի հեմոֆիլիաները շղթայված են X քրոմոսոմի հետ, որի կրողը կանայք են և փոխանցում են միայն իրենց տղա երեխաներին: C տիպը շղթայված չէ՝ հավասարաչափ կարող են հիվանդանալ և՛ տղաները, և՛ աղջիկները»:
2003 թ. ՀՀ առողջապահության նախարարության և Հեմոֆիլիայի համաշխարհային ֆեդերացիայի միջև կնքվել է հուշագիր, որի շրջանակներում Արյունաբանական կենտրոնը ստացել է հակահեմոֆիլային գործոններ: Համագործակցության շրջանակներում իրականացվել են մի շարք աշխատանքներ:
