Արգենտինայի կառավարությունն ազգայնացնում Yacimientos Petroliferos Fiscales (YPF) նավթային ընկերության ակտիվների 51%-ը, որի վրա հսկողությունը պատկանում է իսպանական Repsol ընկերությանը:
Ինչպես հաղորդում է BBC-ն, երկրի նախագահ Քրիստինա Ֆերնանդես դե Կիրշները հայտարարել է, որ խորհրդարան կմտցնի համապատասխան օրինագիծ:
Իսպանիայի արտաքին գործերի նախարար Խոսե Մանուել Գարսիա Մարգալիոն իր հերթին հայտարարել է, որ Արգենտինայի այդ քայլը խախտում է երկու երկրների միջև «բարեկամության մթնոլորտը»:
Իսպանիան և Եվրամիությունն արդեն իրենց անհանգստությունն են հայտնլ YPF-ի հնարավոր ազգայնացման կապակցությամբ, որում Repsol-ի մասնաբաժինը կազմում է 57.4%:
Ելույթ ունենալով ընկերության ազգայնացման թեմայով՝ Արգենտինայի նախագահը հայտարարել է, որ էներգիայի աղբյուրները «հսկայական նշանակության ռեսուրսներ են»:
YPF-ի ազգայնացված մասը կբաժանվի կառավարության և նավթարդյունահանող շրջանների միջև:
Ազգայնացման մասին հայտարարությունից հետո ընկերության բաժնետոմսերի արժեքը Նյու Յորքի ֆոնդային բորսայում ընկել է 18%-ով:
Արգենտինայի կառավարությունը բազմիցս քննադատության է ընթարկել YPF-ին երկրի նավթային պաշարները ոչ բավարար չափով իրացնելու համար: Ավելի վաղ իշխանություններն ընկերությանը արգելել էին նավթ արդյունահանել երկրի որոշ նավթահանքերում, այդ թվում՝ ամենախոշորներում:
Վերջին շրջանում լուրեր էին պտտվում, որ Արգենտինայի կառավարությունը պատրաստվում է ավելացնել իր ներկայությունը YPF-ում:
Իսպանիան նախկինում զգուշացրել էր Արգենտինային, որ «YPF-ի նվաճումը կհարվածի Արգենտինայի հեղինակությանը» միջազգային թատերաբեմում:
Եվրամիությունն արդեն ակնարկել է, որ այս հարցում պաշտպանում է Իսպանիային:
