Թիվ 7 ընտրատարածքում պատգամավորության թեկնածու առաջադրված, Հայ ազգային կոնգրեսի ներկայացուցիչ, Հայկական Ժամանակ օրաթերթի գլխավոր խմբագիր Նիկոլ Փաշինյանի համակիրները Հարավ-Արեւմտյան թաղամասում քարոզչություն իրականացնելիս բախվել են անհայտ անձանց հարուցած խոչընդոտներին:
Երբ Փաշինյանի կողմնակիցները փորձել են նրա անունից նամակներ բաժանել անցորդներին` տարածքի բնակիչ-ընտրողներին, նրանց են մոտեցել անհայտ անձինք եւ խոչընդոտել են նամակների բաժանումը:
Ընդ որում, խոչընդոտողների մեջ եղել են նաեւ կանայք, որոնք նույնպես փորձել են արգելել նամակների բաժանումը, սպառնալիքներ են տեղացել Նկոլ Փաշինյանի երիտասարդ համակիրների հասցեին
Նիկոլ Փաշինյանի համակիրները տեղեկացրել են, որ իրենց գործողություններին խոչընդոտել են նույն տարածքում թեկնածու առաջադրված, օլիգարխ Սամվել Ալեքսանյանի կողմնակիցները:
Նախ, խոչընդոտելու փորձը եղել է Հարավ-Արեւմտյան թաղամասի Սվաճյան 37 հասցեում, հետո էլ երկու կանայք Նիկոլի կողմնակիցներին փորձել են խոչընդոտել Բաբաջանյան 97 եւ 99 շենքերի բնակիչներին նամակներ բաժանելու ժամանակ:
Մոտեցած կանայք սպառնացել են, քաշքշել, հայհոյել Փաշինյանի քարոզչությունն իրականացնող անձանց:
Փաշինյանի ներկայացուցիչները միջադեպի մասին հայտնել են ոստիկանությանը:
