Ընտրությունների արդյունքները որոշելու է ոչ թե PR-ը, այլ թե ինչ պայմանավորվածություններ են ձեռք բերվելու «ռազբորկաների» արդյունքում: Այսօր «Առաջին լրատվական»-ի հետ զրույցում նման տեսակետ հայտնեց ՌԱՀՀԿ փորձագետ Էդգար Վարդանյանը:
Հարցին, թե Գյումրիի քաղաքապետի այն հայտարարությունը, որ իր փեսայի սպանության մեղավորները ԲՀԿ-ականներ են, ի՞նչ ազդեցություն կունենա ԲՀԿ ռեյտինգի վրա, փորձագետը պատասխանեց, որ բոլոր տեսակի վարկաբեկող նյութերը, անկախ նրանից, թե որքանով են դրանք հիմնավորված, բացասական առումով իրենց ազդեցությունը թողնում են կուսակցությունների ռեյտինգի վրա:
Ըստ նրա` բայց թե որքանով կարող են որոշիչ լինել կուսակցությունների հաջողության վրա ընտրություններում՝ դա արդեն մի փոքր այլ խնդիր է, և ամեն կոնկրետ դեպք պետք է առանձին քննարկել և դիտարկել: Է. Վարդանյանի դիտարկումներով` հնարավոր է, որ շատ քիչ ազդեցություն ունենա, ընդհանուր առմամբ մոռացության մատնվի: «Այստեղ ամենակարևորն այն է, որ այդ հակափիառը, ըստ էության, մեծ դեր է խաղում այն ժամանակ, երբ իրականում հավասար պայմաններ են ստեղծված և կուսակցությունները միմյանց հետ մրցակցային հարաբերությունների մեջ են և այլ գործոններ չկան, որոնք առավելություն են տալիս այս կամ այն կուսակցությանը: Այս դեպքում չնչին ինչ-որ բան կարող է մեծ ազդեցություն թողել ընտրությունների արդյունքների վրա: Իսկ այս դեպքում, երբ ընտրություններն ի սկզբանե անցնում են անհավասար մթնոլորտում, կարող ենք ասել, որ դրանք արդար և ազատ չեն լինում՝ անկախ քվեարկության ընթացքից»,- մեկնաբանեց փորձագետը` հավելելով, որ այս առումով բոլոր քայլերը զուտ ներխմբային, ներկլանային «ռազբորկաների» դաշտից են, այսինքն` ընտրությունների արդյունքները որոշելու է ոչ թե PR-ը, այլ այն, թե ինչ պայմանավորվածությունների են գալու այդ «ռազբորկաների» արդյունքում: