Թուրքական Zaman թերթի փոխանցմամբ՝ թուրքերի հետ հաշտվելու կողմնակից հայերը, չնայած խիստ քննադատություններին, մասնակցել են Վաշինգտոնում կազմակերպված «Հայ-թուրքական հաշտեցում» խորագրով թեմայի քննարկումներին:
Դրանք նախաձեռնել է «Հայ-թուրքական հաշտեցմամբ» զբաղվող HasNa հասարակական կազմակերպությունը, որը հանդես է գալիս 2007 թվականին Ստամբուլում սպանված հայ լրագրող Հրանտ Դինքի «Միակ լուծումը երկխոսությունն է» կարգախոսով:
Սրանից առաջ California Courier թերթի խմբագիր Հարութ Սասունյանը գրել էր, որ HasNa խմբի հանդիպումները տեղի են ունենում Թուրքիայի ԱԳՆ-ի ջանքերով:
Հիշեցնենք, որ ժամանակին Հրանտ Դինքը հայտարարել էր, որ իր կարծիքով՝ Թուրքիայի կառավարությունը երկու դեպքում կարող է ճանաչել Հայոց ցեղասպանությունը` միջազգային հանրության ճնշման տակ (ինչը, մասնավորապես, վերաբերում է ԵՄ-ին Թուրքիայի անդամակցության ձգտմանը) կամ սեփական ժողովրդի պահանջով:
Ըստ Դինքի ՝ Թուրքիայի կողմից Հայոց ցեղասպանության ճանաչմանը հասնելու լավագույն ճանապարհը Թուրքիայի` ժողովրդավարական երկիր դառնալն է, երբ «ներքևից» պահանջ կլինի և հասարակությունն ինքը` առանց արտաքին ճնշումների՝ «վերևից», կճանաչի Հայոց ցեղասպանությունը:
