Երևան քաղաքում իրականացվող շինարարական աշխատանքները, ըստ բնապահպան Ինգա Զառաֆյանի, կհանգեցնեն շատ լուրջ բնապահպանական խնդիրների. «Այսօր Երևանում շատ քիչ են այն ծառերը, որոնց վրա թռչունները կարող են բնադրել: Մենք սկսեցինք մի ծրագիր, երբ ծառերի վրա թռչունների համար նախատեսված բներ էինք տեղադրում, սակայն վերջին տարիներին ծրագիրը չենք կարողանում իրականացնել զուտ այն պատճառով, որ այդ ծառերի մեծամասնությունը հատել են»:
Բնապահպանի կարծիքով՝ քաղաքը միայն դեկորատիվ ծառերով չպիտի հագեցնել, դա բավական է միայն գեղեցիկ քաղաք ունենալուն, իսկ երկարամյա ծառերը հատելու դեպքում քաղաքից հեռանում են թռչունները, ինչպես նաև՝ հնամյա ծառերի կորուստ ենք ունենում:
Հանրային խորհրդի անդամ, բնապահպան Կարինե Դանիելյանի կարծիքով էլ՝ վերջին տասը տարիների ընթացքում Երևանում իրականացվող շինարարությունը հակաէկոլոգիական և հակասոցիալական է. «Երևանի կառուցապատումը խիստ նվազեցրել է քաղաքի կանաչ գոտիները, մենք պիտի ամեն ինչ անենք, որ քաղաքը փրկենք էկոլոգիական աղետից, որի համար պատրաստ ենք օգնել քաղքապետարանին»:
Նշենք նաև, որ Երևանի կանաչապատման վերաբերյալ դեռևս փետրվար ամսվա վերջին Երևանի քաղաքապետարանը ներկայացրել է ծրագիր, ըստ որի՝ 2012-ին Երևանում ավելի շատ կանաչ և բարեկարգ տարածքներ են լինելու, որի շրջանակներում բարեկարգվելու են Երևան մտնող ավտոճանապարհները, պողոտաները, կանաչ տարածքները, պուրակները: Դրանք կձևավորվեն նոր սիզամարգերով և ծաղկային տարածքներով, որոնց պահպանության համար կանցկացվի 27 հազար գծամետր ոռոգման ցանց, իսկ դեկորատիվ և մշտադալար ծառերի համար ՀՀ մարզերից բերվել է շուրջ 19 հազար խմ կարմիր ավազ և բուսահող:
