ՀՀԿ-ական պատգամավոր Հովհաննես Սահակյանը շնորհակալ է Հայ ազգային կոնգրեսի առաջնորդ Լևոն Տեր-Պետրոսյանից, քանի որ նրա հորդորները՝ քվեարկել բոլորի, բացի ՀՀԿ-ից ու ՕԵԿ-ից, օգտին, միայն ավելացնում են Հանրապետականի ընտրազանգվածը: Այս մասին պատգամավորն ասաց «Առաջին լրատվական»-ի հետ զրույցում:
«ՀՀԿ-ն նրանից նման նվեր երբևէ չէր սպասի: Լևոն Տեր-Պետրոսյանի այս հայտարարությունից հետո մեր ընտրողների թիվը ոչ թե բազմապատկվեց, այլ եռապատկվեց: Սա իսկապես նախընտրական լուրջ նվեր էր: ՀԱԿ առաջնորդի խոսքը մեկնաբանելով նախընտրական ժամանակաշրջանի տրամաբանության մեջ՝ կարելի է ասել, որ Լևոն Տեր-Պետրոսյանն ու Հայ ազգային կոնգրեսը ասելիքի պակաս ունեն: Ընտրողների հետ հանդիպումների ժամանակ իրենց ծրագրերը ներկայացնելու փոխարեն նա փորձում է այլ քաղաքական ուժերի հետ կապված խնդիրներ լուծել՝ դրանով ապացուցելով սեփական թուլությունը: Տեր-Պետրոսյանն իր կարճ մտածելով կարծում է, որ եթե խորհուրդ տա ձայն չտալ ՀՀԿ-ին, ապա նրա քվեները մի փոքր կնվազեն: Այ սա հատկապես խոսում է, որ Լևոն Տեր-Պետրոսյանն ու Հայ ազգային կոնգրեսը ասելիք չունեն: Ասելիքները մանր-մունր, նեղ անձնական կամ կուսակցական, խռովկան կնոջը բնորոշ ասելիքներ են»,- ասաց Հովհաննես Սահակյանը:
Նշենք, որ ՀԱԿ ղեկավար Լևոն Տեր-Պետրոսյանը Եղվարդում նախընտրական հանրահավաքի ժամանակ ժողովրդին կոչ է արել առաջիկա խորհրդարանական ընտրություններում քվեարկել ցանկացած կուսակցության օգտին, բացի իշխող ՀՀԿ-ից և նրա կցորդ «Օրինաց Երկրից»: Նրա խոսքով` ինքը համաձայն է, որպեսզի իշխանությունը երկրում անցնի ՀՅ Դաշնակցությանը, անգամ կոմունիստներին, բայց ոչ ՀՀԿ-ին: