Հոկտեմբերի 27-ի ոճրագործությունից անցել է տասնմեկ տարի: 1999 թ. այդ օրը Ազգային ժողովի շենք ներխուժած հրոսակախմբի զոհը դարձան Աժ նախագահ Կարեն Դեմիրճյանը, վարչապետ Վազգեն Սարգսյանը, ԱԺ փոխնախագահներ Յուրի Բախշյանը, Ռուբեն Միրոյանը, «Միասնություն» դաշինքի պատգամավորներ Հենրիկ Աբրահամյանը, Արմենակ Արմենակյանը, Միքայել Քոթանյանը, օպերատիվ հարցերի նախարար Լեոնարդ Պետրոսյանը: Հետադարձ հայացքով ինչպե՞ս են գնահատում կատարվածը զոհերի հարազատները: Ակնկալու՞մ էին, որ անցած տարիների ընթացքում կբացահայտվեն եւ արդարացի պատիժ կստանան ոճրագործության պատվիրատուները, թե՞ ոչ: Զոհված ԱԺ պատգամավոր Միքայել Քոթանյանի որդին` Տիգրան Քոթանյանը, նշում է, թե ժամանակին սպասում էր, որ կբացահայտվեն ոճրագործության պատվիրատուները: « Միակ ակնհայտ փաստն այն է, որ սպանությունները գործած անձինք կալանավորված են», – «1in.am»-ին հայտնեց նա: Այլ հարցերի Տիգրան Քոթանյանը հրաժարվեց պատասխանել` նշելով, որ ինքը փաստեր չունի եւ զոհված ԱԺ պատգամավորի որդի է: «Ձեր հարցերն ուղղեք այն մարդկանց, որոնք քաղաքական որոշումներ են կայացնում եւ քաղաքական պատասխանատվություն են ստանձնել: Այսօր ես ինչ էլ ասեմ, կլինի սուբյեկտիվ», – նշեց նա:
