Ազգային ժողովի փոխնախագահ Էդուարդ Շարմազանովը ապրիլի 13-ին հանդիպել է Հայաստանում Լատվիայի Հանրապետության արտակարգ և լիազոր դեսպան Գինտս Ապալսին: Հանդիպմանը ներկա է եղել նաև Լատվիայում Հայաստանի պատվավոր հյուպատոս Արմեն Ղասաբօղլյանը:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ ողջունելով հյուրին` Աժ փոխնախագահը Հայաստանի ու Լատվիայի հարաբերությունները բնորոշել է որպես բարիդրացիական և նշեց, որ երկու երկրները համագործակցության մեծ ներուժ ունեն քաղաքական, տնտեսական, կրթության ու մշակույթի ոլորտներում:
Շարմազանովը նկատել է, որ 21-րդ դարը պետք է դառնա նոր դարաշրջան երկկողմ հարաբերությունների զարգացման համար: Փոխգործակցությունն ակտիվացնելու համատեքստում զրուցակիցները կարևորել են միջխորհրդարանական կապերի հաստատումը, ինչպես նաև համագործակցությունը և փոխադարձ աջակցությունը տարբեր ձևաչափերի միջազգային միջխորհրդարանական կառույցներում: Կողմերը նշեցին, որ քաղաքական կուսակցությունների միջև շփումներն ակտիվացնելու նոր շրջանակ կարող է դառնալ նաև ԵԺԿ-ն, որին նոր է անդամակցել ՀՀԿ-ն: Լատվիայի դեսպանը հատկանշական է համարել, որ իրենց խորհրդարանում Հայաստանի հետ բարեկամության խումբն ամենամեծաթիվն է: Ըստ դեսպանի`սա վկայում է լատվիացիների բարեկամական վերաբերմունքն ու մեծ հետաքրքրությունը հնագույն մի երկրի նկատմամբ, որը հաճախ է դիմակայել դժվարություններին իր հոգևոր և քրիստոնեական արժեքներով:
Աժ փոխնախագահի խոսքերով` Հայաստանն ու Լատվիան ընդհանրություններ շատ ունեն` այդ թվում և անկախության համար պայքարում: Նա երկու երկրներին միավորող գործոն է համարել նաև եվրաինտեգրումը, և, որպես ԵՄ անդամ երկրի, Լատվիայի փորձն ու աջակցությունն օգտակար համարեց Հայաստանի համար եվրաինտեգրման ճանապարհին:
Զրուցակիցներն անդրադարձել են Հայաստանում կայանալիք խորհրդարանական ընտրություններին: Էդուարդ Շարմազանովը հավաստիացրել է, որ իշխանություններն ունեն քաղաքական կամք` ազատ և արդար ընտրություններ անցկացնելու համար: Նրա խոսքերով` Հայաստանի համար ժողովրդավարացումը այլընտրանք չունի, և դա հասկանում են բոլորը: Աժ փոխնախագահը ներկայացրեց նախընտրական գործընթացները` նշելով, որ օրերս մեկնարկած քարոզարշավում բոլոր կուսակցություններին տրված են հավասար հնարավորություններ:
Հանդիպման ընցթացքում խոսվել է նաև ԼՂ հակամարտության մասին: Դեսպան Գինտս Ապալսն անդրադարձավ Եվրամիության դերակատարությանը խնդրի կարգավորման գործընթացում: Էդուարդ Շարմազանովը նկատել է, որ ԵՄ օժանդակությունը կարող է շատ կարևոր լինել, սակայն խնդրի կարգավորման ամենաարդյունավետ և գործուն ձևաչափը ԵԱՀԿ Մինսկի խումբն է: Նա համոզմունք հայտնեց, որ խնդիրը ոչ թե ձևաչափի ընտրության մեջ է, այլ` Ադրբեջանի ապակառուցողական վարքագծի ու ռազմատենչ հայտարարությունների: «ԵՄ-ն մեզ օգնած կլինի, եթե իրերը կոչի իրենց անունով»,-ասաց պրն. Շարմազանովը և պարզաբանեց. «Եվրանեսթի» Բաքվում կայացած լիագումար նիստի ընթացքում Իլհամ Ալիևի «ֆաշիստներ» անվանարկումն ուղղված հայերին այդպես էլ քննադատության չարժանացավ եվրոպացի որևէ պաշտոնյայի կողմից:
Հանդիպման վերջում Լատվիայի դեսպանը ևս հաստատել է հարաբերություններին նոր լիցք հաղորդելու և շփման նոր եզրեր գտնելու անհրաժեշտությունը: Այս առումով նա կարևորել է Աժ նախագահի ծրագրված այցը Լատվիայի Հանրապետություն:
