Ադրբեջանական Trend լրատվական գործակալության փոխանցմամբ՝ Թուրքիայի նախագահ Աբդուլլահ Գյուլի գլխավոր խորհրդական Էրշաթ Հյուրմուզլուն երեկ հայտարարել է, որ եթե սիրիական բանակը վերստին խախտի Թուրքիայի սահմանները, ապա Թուրքիան, ի պատասխան դրա, կձեռնարկի ավելի կոշտ միջոցներ.
«Թուրքիան ի վիճակի պաշտպանել իր սահմանն ու իր մոտ ապաստան գտած սիրիացի փախստականներին: Եթե այդ դեպքը կրկնվի, ապա Թուրքիան կտրուկ պատասխան կտա Սիրիային: Թուրքիան ՆԱՏՕ-ի անդամ է, և եթե անհրաժեշտ լինի, նա կարող է իր սահմանների պաշտպանության համար դիմել ՆԱՏՕ-ի անդամների օգնությանը:
Ասադի ռեժիմը չի կատարում հրադադարի վերաբերյալ տված խոստումները: Ավելի վաղ Ասադը նույնպես շատ խոստումներ է տվել, սակայն չի կատարել դրանք, ինչի համար էլ Թուրքիան թերահավատորեն է մոտենում հրադադարի վերաբերյալ Դամասկոսի հայտարարություններին: Ներկայումս Սիրիայում բռնությունները դադարել են, սակայն հայտնի չէ, թե որքան կարող է տևել այդ հրադադարը: Դժվար է հավատալ Ասադի խոսքերին:
Եթե անգամ Սիրիայում բռնություններն իսկապես դադարեցվեն, այնուամենայնիվ, սիրիացիները շարունակելու են պահանջել իշխող ռեժիմի հեռացումը: Եվ հայտնի չէ, թե այդպիսի իրավիճակում ինչպես իրեն կդրսևորի Սիրիայի ղեկավարությունը»։
