Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է 8 տարբեր աղջիկների պոռնկությամբ շահագործած կանանց հանցախմբի դատավարությունը:
Դատական նիստը շարունակվում է դռնփակ պայմաններում:
Ամբաստանյալներից Հասմիկ Առաքելյանի պաշտպան Կարեն Քամալյանը «Առաջին լրատվական»-ի հետ զրույցում նշեց, որ առայժմ դատարանը շարունակում է տուժողների հարցաքննությունը: Ըստ երևույթին, գործով մնացել է հարցաքննության ենթակա 3 տուժող, որոնցից յուրաքանչյուրի հարցաքննությունը մի ամբողջ դատական նիստ է տևում: Կարեն Քամալյանը «Առաջին լրատվական»-ին հայտնեց, որ դատական նիստից մանրամասներ հրապարակել չի կարող, քանի որ դրանք վերաբերում են տուժողների անձնական կյանքին: Ամեն դեպքում, պաշտպանի խոսքով, տուժողների հարցաքննությունից հետո դատարանը դատավարությունը կշարունակի դռնբաց պայմաններում, իսկ այդ փուլում արդեն կհրապարակվեն ամբաստանյալների և նրանց պաշտպանների պաշտպանական ճառերը: Դա, ըստ երևույթին, կլինի մոտ երեք դատական նիստերից հետո:
Հիշեցնենք, որ հանցախմբի, ըստ երևույթին, ղեկավար համարվողին` բանգլադեշցի Աղունիկ Այվազյանին, մեղադրանք է առաջադրվել այն բանի համար, որ նա թրաֆիքինգի` շահագործման նպատակով մարդկանց հավաքագրելու, տեղափոխելու, փոխանցելու, թաքցնելու, ինչպես նաև սեռական շահագործման ենթարկելու ու պահելու դիտավորությամբ, միավորվելով Արաբական Միացյալ Էմիրություններում բնակվող Նելլի Ներսիսյանի հետ և վերջինիս միջոցով նաև Ծովիկ Ավետիսյանի, Վահան Ավետիսյանի, Հասմիկ Առաքելյանի, Ազատուհի Հայրապետյանի, Աշոտ Ներսիսյանի, Սիլվա Հովսեփյանի, ոմն Նառայի, Սերինեի և քննությամբ դեռևս չպարզված այլ անձանց հետ, ստեղծել է կազմակերպված հանցավոր խումբ և իր հանցավոր մտադրությունն իրականացնելու նպատակով հավաքագրված կանանցից վերցրել է անձնագրերը, ապա առողջության համար վտանգավոր բռնություն գործադրելու սպառնալիքով և ոչ վտանգավոր բռնության գործադրմամբ, վիճակի խոցելիությունը օգտագործելով, ներգրավել է նրանց մարմնավաճառության մեջ` տևական ժամանակ դնելով և պահելով պոռնկության շահագործման վիճակի մեջ ու ստացել նրանց կողմից վաստակած գումարները:
Թրաֆիքինգի վերաբերյալ հերթական գործը Կենտրոնի դատարան ստացվել է 2011 թվականի հունիսին, իսկ գործն այժմ քննվում է դատավոր Գագիկ Պողոսյանի նախագահությամբ: Դատական հաջորդ նիստը նշանակվել է ապրիլի 12-ին:
