Իսպանիայի ներքին գործերի նախարար Խորխե Ֆերնանդես Դիասը երկրի խորհրդարանին է ներկայացրել Քրեական օրենսգրքում փոփոխություններ կատարելու նախագիծ, որը նախատեսում է պատժել փողոցային ցույցերի կազմակերպիչներին, որոնք «լրջորեն խախտում են հասարակական կարգը»: Այս մասին հայտնում է The Daily Telegraph պարբերականը:
ՆԳ նախարարության պլանի համաձայն` այդպիսի ակցիաների կազմակերպման մեղավորները պետք է պատժվեն 2 և ավելի տարի ազատազրկմամբ:
Դիասը նկատել է, որ այդ փորձերը, որոնք կարող են հրահրվել նաև սոցցանցերի միջոցով, պետք է ներառվեն քրեորեն պատժելի գործողությունների մեջ:
Միաժամանակ, նա առաջարկել է պատժել նաև այն ցուցարարներին, որոնց անցկացրած ցույցը կրում է խաղաղ բնույթ, սակայն չեն արձագանքում ոստիկանության` ցրվելու կոչին: Ըստ նրա` այդ պարագայում ցուցարարի գործողությունը պետք է դիտարկվի որպես այնպիսին, ինչպիսին դատարանի նկատմամբ անհարգալից վերաբերմունքն է:
Նախարարն առաջարկել է հանցագործություն որակել նաև «իրավապահների կոչերին զանգվածային, ակտիվ կամ պասիվ կերպով ընդդիմանալը»:
