ԱՄՆ-ի ընդհանուր ծառայության ադմինիստրացիայի աշխատակիցներն այսուհետ անմիջապես ղեկավարությանը կզեկուցեն գանձարանի միջոցների` իրենց հայտնի դարձած փոշիացումների դեպքերի մասին:
Նրանք այսպիսի հանձնարարություն են ստացել չորեքշաբթի իրենց գերատեսչության նոր ղեկավար Դեն Թանգերլինիից, որի նախորդները`Մարթա Ջոնսոնն ու նրա երկու տեղակալները, աշխատանքից հեռացել էին աղմկոտ սկանդալից հետո, որն առաջացել էր բյուջետային միջոցները ոչ նպատակահարմար ծախսելու հետևանքով: Այս մասին հայտնում է ITAR-TASS գործակալությունը:
Ինչպես պարզվել է, 2010թ. Ընդհանուր ծառայության ադմինիստրացիայի պաշտոնյաները ԱՄՆ խաղային մայրաքաղաք Լաս Վեգասում կազմակերպել են «որակավորման բարձրացման սեմինար»` դրա կազմակերպման վրա ծախսելով 823 հազար դոլար: Հարկատուների վճարած գումարները ծսխսվել էին ոչ միայն 300 անձի ավիատոմսերի ու հյուրանոցային համալիրների վրա, այլև «հեծանիվների հավաքման ուսումնական զբաղմունքի», հուշանվերների ու պարահոգեբանների ծառայությունների վրա:
Իրավիճակի լրջությունն այն է, որ հենց այս գերատեսչությունը ի պաշտոնե կոչված է վերահսկելու պետական գույքի կառավարումն ու գանձարանի միջոցների ճիշտ բաշխումը:
Երբ այս պատմությունը դուրս եկավ ջրի երես, անմիջապես հաջորդեցին պատժիչ միջոցառումները: Սպիտակ տան աշխատակազմի ղեկավար Ջեք Լյուն հայտարարեց, որ ԱՄՆ նախագահ Բարաք Օբաման չափազանց վրդովված է հարկատուների գումարների նկատմամաբ նման վերաբերմունքից ու պահանջում է մեղավորներին ենթարկել պատասխանատվության: