Հունվարի 21-ը գրկախառնության միջազգային օրն է: Այս օրը Ամերիկայում ուսանողական շրջանում սկսել են նշել 1986 թվից՝ որպես ազգային տոն, սակայն տարիներ անց այն լայն տարածում գտավ ողջ աշխարհում: Ավանդույթի համաձայն, այս օրը բոլորը` ծանոթ-անծանոթ, պետք է իրար ամուր գրկեն: Համաձայն լեգենդի, ընկերական գրկախառնության ժամանակ մարդիկ փոխանակվում են հոգեկան ջերմությամբ:
Հոգեբան Նունե Լևոնյանը կարծում է, որ մարդիկ նմանատիպ օրեր ստեղծում են, որպեսզի առօրյայում մոռացվող հուզական շփումը մի քիչ ավելի ակտիվանա. «Նմանատիպ օրերը հատուկ ստեղծված են նրա համար, որպեսզի կարողանանք վերագտնել հուզական կապը: Օրինակ՝ կենդանիների, մասնավորապես վագրերի մոտ, «գրկախառնություն» ասվածը կա. նրանք կարող են հարձակվել ուտելիքի վրա, իսկ հետո իրար քսմսվել և այդպես վերագտնել կապը միմյանց միջև։ Մարդկանց մեջ դա փոքր-ինչ պակաս վայրենի ձևով է արվում. առօրյայում մարդիկ կարող են իրար շատ վիրավորել, անտարբեր լինել, իսկ այսպիսի օրերի հնարավորություն են ունենում թեկուզ արհեստականորեն այդ կապը վերագտնել»:
Մենք գրկախառնվում ենք մեր հարազատների, ընկերների հետ հանդիպման և հրաժեշտի ժամանակ՝ հայտնելով մեր ուրախությունն ու շնորհակալությունը նրանց: