Կենսաթոշակային բարեփոխումները ՀՀ կառավարության կողմից իրականացվող ամենախայտառակ գործընթացն են. «Սիվիլիթաս» հիմնադրամում այսօր կազմակերպված քննարկման ժամանակ ասաց ՀՅԴ պատգամավոր Արա Նռանյանը:
«Եթե այդ բարեփոխումները կյանքի կոչվեն, խայտառակ ծանրության բեռ կդառնան քաղաքացիների համար: Մարդիկ տարիներ անց կհայտնաբերեն, որ ավելի վատ վիճակում են, քան ԽՍՀՄ-ի փլուզումից հետո: Այս քաղաքականության մեջ մարդն անտեսված է, առաջնային պլան է մղված կրկին գործարարությունը»,- ասաց նա:
Նրա խոսքով՝ ՀՅԴ-ն լիարժեքորեն ծանոթ է Հայաստանի տնտեսական խնդիրներին և պատրաստ է լուծել դրանք:
Քննարկմանը ներկա «Ժառանգություն» կուսակցության պատգամավոր Արմեն Մարտիրոսյանն իր հերթին նկատեց, որ ապահովագրության համակարգը մի քանի անհատների համար գերշահույթներ ու հսկայական եկամուտներ ապահովելու աղբյուր է:
«Կենսաթոշակային համակարգը Հայաստանում իսկական խայտառակություն է: Ինչ վերաբերում է սոցիալական քաղաքականությանը, ապա «Ժառանգությունը» նախատեսում է աշխատավարձերի ու կենսաթոշակների բարձրացում, տարեկան հարյուր հազար աշխատատեղերի հիմնում: Բացի այդ, կազմակերպելու ենք մեծ հայրենադարձություն՝ ՀՀ բնակչության թվաքանակը հասցնելով չորս միլիոնի»,- ասաց նա:
Ամփոփելով՝ Արմեն Մարտիրոսյանը նկատեց՝ եթե հնարավոր լինի Հայաստանը դարձնել ինքնիշխան, ապա հնարավոր կլինի նաև միասին սարեր շարժել:
