«Մուսուլման եղբայրներ» իսլամիստական շարժման կողմնակիցները, ովքեր մեծամասնություն են կազմում Եգիպտոսի խորհրդարանում, կհամաձայնեն Արժույթի միջազգային հիմնադրամի կողմից Եգիպտոսին հատկացվող վարկը վերցնել միայն այն ժամանակ, երբ կկազմավորվի նոր կառավարությունը:
«Եգիպտական խորհրդարանը համաձայնություն կտա ԱՄՀ-ի կողմից 3,2 մլրդ դոլարի չափով վարկի տրամադրմանը միայն մի պայմանով, եթե այն տրվի կառավարության ձևավորումից հետո, այսինքն՝ նախագահական ընտրություններից հետո»,- ասել է «Մուսուլման եղբայրներ» շարժման նախագահի թեկնածու Հայրաթ աշ-Շատիրը:
Աշ-Շատիրը պարզաբանել է, որ խնդիրը վարկի տրամադրման ժամկետը չէ, նույնիսկ պայմանները չեն, այլ գործող կառավարության անարդյունավետ տնտեսական քաղաքականությունն է:
Եգիպտոսի նախագահական ընտրությունները անցկացվելու են մայիսի 23-24-ը, իսկ նոր նախագահի անունը պետք է հրապարակվի մինչև հունիսի վերջը: Մինչև այդ ժամանակն էլ զինվորականները, որոնք մինչ այժմ ղեկավարում են երկիրը, պարտավորվել են իշխանությունը հանձնել ընտրված նախագահին:
Ներկա դրությամբ ԱՄՀ-ի և Կահիրեի միջև բանակցությունները գտնվում են կազմակերպչական հարցերի համաձայնեցման փուլում: ԱՄՀ–ն Եգիպտոսին 3,2 մլրդ դոլարով օգնելու համար պետք է ունենա առաջին հերթին հենց այդ երկրի համաձայնությունը:
