Մարդիկ, ովքեր բացահայտ հանդես են գալիս սեռական փոքրամասնության ներկայացուցիչների դեմ, իրենք կարող են լինել թաքնված նույնասեռականներ կամ լեսբուհիներ, կարծում են հետազոտողները:
Նրանք պնդում են, որ հոմոֆոբներին ձգում են իրենց սեռի մարդիկ, բայց նրանք իրենց մեջ այդ զգացումը անվանում են ատելություն: Ինչպես գրում է The Daily Mail-ը, այդպիսի վարքագծի պատճառները թաքնված են դաստիարակության մեջ: Պարբերականը հենվում է գիտնականների ուսումնասիրության վրա, որը պետք է մոտ ապագայում հրատարակվի Journal of Personality and Social Psychology ամսագրում:
Հետազոտության հեղինակները` Նյու Յորքի, Կալիֆոռնիայի ու Էսեքսի համալսարանի գիտնականները, համարում են, որ սեռական փոքրամասնության ներկայացուցիչները հիշեցնում են հոմոֆոբներին հենց իրենց, ինչը նրանց մոտ հարուցում է վախ ու ծնում է ագրեսիա: Դա տեղի է ունենում այն բանի պատճառով, որ հոմոֆոբների մեծամասնությունը դաստիարակվել է այնպիսի ընտանիքներում, որտեղ միասեռականությունը անընդունելի է համարվել:
Դրա հետևանքով մարդիկ հակված են իրենց մեջ ճնշել իրենց իրական սեքսուալ հակումները: Իսկ նրանց ներքին չլուծված խնդիրը ժամանակի ընթացքում կարող է դուրս սպրդել` միասեռականների դեմ ագրեսիայի տեսքով:
Գիտնականների փորձերին մասնակցել է 160 ուսանող ԱՄՆ-ից ու Գերմանիայից: Գիտնականները տարբեր թեսթերի միջոցով սեռական կողմնորոշման մասին նրանց բարձրաձայնածը համեմատել են այն տվյալների հետ, թե ինչպես է արձագանքել նրանց ենթագիտակցությունը` ավանդական ու ոչ ավանդական կողմնորոշման մասին լսելու կամ տեսնելու ժամանակ:
Այսպիսով՝ գիտնականները հաստատում են ավելի վաղ կատարված ենթադրությունները:
