«Ժառանգություն»-ը և կուսակցության հետ նույն ցուցակով խորհրդարանական ընտրություններին մասնակցող «Ազատ դեմոկրատներ»-ն իրենց նախընտրական քարոզարշավն «Արմենիա-Մարիոթ» հյուրանոցում մեկնարկեցին միայն օրհներգի կատարումից հետո: Իսկ մինչ մեկնարկը դահլիճում հնչում էր Արտո Թունջբոյաջյանի «Արարատ» երգը:
«Ինչպես գիտեք` մենք բոլորս գնում ենք դեպի նոր Հայաստան, իսկ նոր Հայաստանի առաջնորդը Րաֆֆի Հովհաննիսյանն է»,- քարոզարշավի մեկնարկն այսպես ազդարարեց «Ազատ դեմոկրատներ» կուսակցության նախագահ Խաչատուր Քոքոբելյանը:
«Ժառանգության» առաջնորդ Րաֆֆի Հովհաննիսյանն իր ելույթում նշեց, որ ի տարբերություն այլ կուսակցությունների՝ իրենք ընտրությունների չեն գնում ողորմության, կեղծ բարեգործության վրա հիմնվելով:
Անդրադառնալով համամասնական ցուցակի վերաբերյալ դժգոհություններին՝ նա ասաց. «Մեկընդմիշտ պատասխանեմ կեղծ հայրենասերներին, չարախոսներին. մենք գործ ունենք անելու` միասին և ի հեճուկս նրանց, բոլորին ներում եմ` իրենց սխալ արտահայտությունների համար»:
«Մայիսի 7-ին կզարթնենք մի վայրում, որտեղ ժողովուրդը տիրություն է անելու թե՛ մեծամասնականով, թե՛ համամասնականով»,- նշեց «Ժառանգության» առաջնորդը, ապա մեկ առ մեկ թվարկեցին իրենց միասնական ցուցակի 73 անունները: Ցուցադրվեց կուսակցության նախընտրական տեսահոլովակը:
