Թուրքիան արդեն այս ամիս սկսելու է Հյուսիսային Կիպրոսում հետախուզական հորատում անցկացնել: MIGNews-ի փոխանցմամբ` այս մասին հայտարարել է Հյուսիսային Կիպրոսի թուրքական պետության էներգետիկայի նախարար Սունաթ Աթունը:
«Մինչ ապրիլի վերջը Turkish Petroleum Corp.-ը կսկսի հորատման աշխատանքները ցամաքում: Անհրաժեշտության դեպքում հորատման սահմանները կընդլայնվեն»,- տեղեկացրել է նա:
Հիշեցնենք, որ անցյալ տարվա վերջին կղզու հունական կողմը սկսել էր իրականացնել հետախուզական հորատում, ինչն առաջացրել էր թուրքերի զայրույթը:
Ինչպես հայտնի է, Անկարան չի ընդունում Կիպրոսի Հանրապետությունը, սակայն հարաբերություններ ունի միջազգային հասարակության կողմից չճանաչված Հյուսիսային Կիպրոսի Թուրքական Հանրապետության հետ, որտեղ 1974 թվականից գտնվում է թուրքական զորքերի կորպուսը:
