Վրաստանը չի պատրաստվում գնել Խաչի վանքը կամ այն 99 կամ 1000 տարով վարձակալել: Խոսքը միայն այն մասին է, որ այն վերադարձվի վրացական հոգևոր տիրույթ: Այսպիսի հայտարարություն է արել Իսրայելում Վրաստանի դեսպան Արչիլ Կեկելիան՝ իսրայելական IzRus ռուսալեզու հրատարակությանը տված հարցազրույցում: Այդ մասին տեղեկացնում է «Ռոսբալտը»:
Նկատենք, որ նա անձամբ է զբաղվում Խաչի վանքի հետ կապված հարցով: Կեկելիան հայտարարել է, որ վրացական իշխանությունները ցանկանում են այն վերադարձնել իրենց հոգևոր ու մշակութային տիրույթ: «Թե ինչպես դա տեղի կունենա, տեխնիկայի հարց է, դրա համար էլ սկսվել են բանակցությունները: Մենք մեր խնդրանքը հայտնել ենք Երուսաղեմի պատրիարք Ֆեոֆիլ 3-րդին: Նա մեզ շնորհակալություն է հայտնել մեր դիրքորոշման համար, քանի որ առկա հրապարակումներից ելնելով՝ որոշակի կասկածներ ունի, որ իր թիկունքում ինչ-որ բանակցություններ են վարվում: Ես ցրել եմ բոլոր կասկածները ու խոստացել, որ նրան տեղյակ կպահեմ բանակցային գործընթացներից»,- բացատրել է Կեկելիան:
Նա տեղեկացրել է նաև, որ Վրաստանի արտգործնախարար Գրիգոլ Վաշաձեն մարտի 4-ին նամակ է գրել իր իսրայելցի գործընկերոջը` Ավիգդոր Լիբերմանին, որտեղ նշված է, որ «մտադիր են Հույն ուղղափառ եկեղեցու հետ բանակցությունները վերսկսել»:
Հիշեցնենք, որ երուսաղեմյան Խաչի վանքը եղել է վրացիներինը, իսկ 17-րդ դարում այն զբաղեցրել է Հույն ուղղափառ եկեղեցին:
