Ալժիրը զգալի թվով զինված ուժեր է կենտրոնացրել երկրի հարավում Մալիի սահմանի մոտ, որտեղ երկու օր առաջ առևանգվել էին Մալիի Գաո քաղաքում Ալժիրի հյուպատոսարանի 7 աշխատակիցներ:
Ինչպես հաղորդում է ալժիրյան Al-Khabar թերթը, հարավային ռազմաբազաներ են ուղարկվել ռազմատրանսպորտային ինքնաթիռներ և ուղղաթիռներ, որոնք տեղափոխել են պաշտպանության նախարարության հատուկ նշանակության ուժեր: Ընդհանուր առմամբ, մարտական բարձր պատրաստականության է բերվել շուրջ 3000 զինծառայող:
Իրադրությանը հետևում է երկրի նախագահ Աբդելազիզ Բուտեֆլիկան, որը խորհրդակցություն է անցկացրել զորքերի բոլոր տեսակների, ՆԳՆ-ի և հետախուզական ծառայությունների ղեկավարների հետ:
Հաղորդվում է նաև, որ Ալժիրի հետ սահմանակից շրջաններում անկախություն հռչակած տուարեգների իշխանություններն իրենց օգնությունն են առաջարկել Ալժիրին՝ պատանդներին ազատելու գործում:
Հիշեցնենք, որ հինգշաբթի անհայտ սալաֆի զինյալները Մալիի Գաո քաղաքում գրավել էին Ալժիրի հյուպատոսարանի շենքը և առևանգել 7 աշխատակիցների, այդ թվում՝ հյուպատոսին: Ընդ որում` նրանք որևէ պայման առաջ չեն քաշել: Ավելի վաղ Գաո էին մտել ապստամբ տուարեգները: Այնուամենայնիվ, նրանց ղեկավարները պնդում են, որ իրենք ոչ մի կապ չունեն սալաֆիների հետ, և նրանցից եկող նույն վտանգը սպառնում է նաև իրենց:
