Ինչպես անցած տարի, 2011թ-ին նույնպես պետբյուջեից` Սյունիքի մարզպետարանին գումարներ չեն հատկացվել շինարարական աշխատանքների համար։ Մինչդեռ մարզում իրականացված այդ աշխատանքների ծավալներն անցած տարի աճել են 6 տոկոսով։ Աշխատանքները իրականացվել են առողջապահության նախարարության ծրագրերի իրականացման գրասենյակի կողմից` 575 մլն դրամ, «Դատաիրավական բարեփոխումների» գրասենյակը՝ 54 մլն, Հայաստանի սոցիալական ներդրումների հիմնադրամը՝ մոտ 413 մլն։ Այս գումարներով իրականացվել են առողջապահական հիմնարկների, դատաիրավական համակարգի շենքերի, դպրոցների ու նախակրթարանների կառուցում և հիմնանորոգում։ Ճանապարհաշինարարության ոլորտին նույնպես գումարներ չեն տրամադրվել։ Ընթացիկ տարվա համար քաղաքաշինության վարչությունը մարզային ավտոճանապարհների պահպանման և շահագործման համար ունի ընդամենը 105 մլն դրամ։ Սա բավականին փոքր գումար է, հատկապես որ այն նախատեսված է 533 կմ երկարությամբ ճանապարհների համար: Իսկ անցած տարի հատկացված գումարներով, մասնավորապես, իրականացվել է Որոտան-Ույծ կամրջի շինարարությունը, հիմնանորոգվել են Լիճք-Տաշտուն, Կապան-Ծավ ճանապարհահատվածները, լայնածավալ աշխատանքներ են կատարվել միջպետական մայրուղու մարզի տարածքով անցնող ինը վթարային հատվածներում: Համաշխարհային բանկի միջոցներով հիմնանորոգվել են Հալիձոր-Շինուհայր, Ագարակ-Կարճևան ճանապարհները:
