Թուրքական Ankara լրատվական գործակալության փոխանցմամբ` Թուրքիայի արտգործնախարար Ահմեդ Դավութօղլուն հեռախոսազրույց է ունեցել Իրանի ազգային անվտանգության բարձրագույն խորհրդի գլխավոր քարտուղար ու բանագնաց Սայիդ Ջալիլիի հետ:
Հեռախոսազրույցի ժամանակ կողմերը քննարկել են Իրանի ու «Վեցյակի» միջև բանակցությունների անցկացման վայրը: Դավութօղլուն կրկնել է այդ հարցում թուրքական առաջարկները: Նշվում է, որ Դավութօղլուն տվյալ խնդրի շուրջ հեռախոսազրույցներ է ունեցել նաև իր իրանցի գործընկեր Ալի Աքբար Սալեհիի հետ:
Իսկ Անկարայում Իրանի դեսպան Բահման Հուսեյնպուրը հայտարարել է, որ թուրք-իրանական հարաբերություններում որևէ լարվածություն գոյություն չունի. «Իրանի ու Թուրքիայի հարաբերությունները երբեք լարված չեն եղել:
Թուրքիայի արտգործնախարար Ահմեդ Դավութօղլուն մեկ տարում 10 անգամ մեկնել է Իրան, իսկ նրա իրանցի գործընկերը մեկ տարում 9 անգամ այցելել է Թուրքիա: Վարչապետ Էրդողանն էլ երեք անգամ ժամանել է Իրան: Էրդողանի իրանական այցն ամենահաջողն էր: Թուրք-իրանական հարաբերություններն անկեղծ են ու գտնվում են ամենաբարձր մակարդակի վրա»:
