Ապրիլի 6-ին թիվ 6 ընտրատարածքում մեծամասնական ընտրակարգով Հայ ազգային Կոնգրեսի կողմից պատգամավորի թեկնածու առաջադրված Ավետ Պողոսյանը հանդիպել է դիտորդական առաքելությամբ Հայաստանում գտնվող ԵԱՀԿ/ԺՀՄԻԳ-ի երկարաժամկետ դիտորդներ Անդրեա Մոկանուին`Ռումինիա և Դիանե Տեցինիին` Կանադա: Հանդիպման ընթացքում քննարկվել են նախընտրական զարգացումներին առնչվող հարցեր:
Հանդիպման ընթացքում Ավետ Պողոսյանը դիտորդներին տեղեկացրել է ընտրացուցակներում առկա մեծ թվով անճշտությունների մասին, մասնավորապես, այն մասին, որ կոնկրետ թիվ 6 ընտրատարածքին առնչվող ընտրացուցակները ավելացվել են 4000 ընտրողով, և որ ընտրացուցակներում ընդգրկվել են գոյություն չունեցող հասցեներ:
Ավետ Պողոսյանը նաև տեղեկացրել է դիտորդներին, որ Հայ ազգային Կոնգրեսի կողմից առաջադրված թեկնածուները խնդիրներ են ունենում նախընտրական շտաբների համար տարածքներ վարձելու հարցում, մասնավորապես, տարածքների տերերը ենթարկվելով ինչ-ինչ ճնշումների` վերջին պահին հետ են կանգնում նախնական պայմանավորվածություններից, և հրաժարվում են տարածք տրամադրել ընդդիմությանը:
Պատգամավորի թեկնածուն առաջարկել է նաև ԵԱՀԿ/ԺՀՄԻԳ դիտորդներին քվեարկության օրը տարբեր տեղամասերով շրջելու փոխարեն, մեկական դիտորդներ թողնել մեկ տեղամասում, ովքեր այնտեղ կգտնվեն տեղամասի բացման պահից սկսված մինչև ձայների հաշվարկի ավարտը:
