Թուրքական Radikal թերթի փոխանցմամբ` նախորդ տարվա ապրիլի 24-ին Բաթմանի նահանգի զորամասերից մեկում սպանված հայազգի զինծառայող Սևակ Շահին Բալըքչըի նշանած Մելանի Քումրույանը նախորդ շաբաթ դատարանում կարևոր ցուցմունքներ է տվել.
«Սևակի սպանությունից մոտ 6 ամիս առաջ՝ հոկտեմբեր և նոյեմբերի ամիսներին, Սևակը զանգահարել է ինձ և հայտնել, որ իր ծառայակիցները շարունակ ճնշումներ են գործադրում վրա: Նրա ծառայակիցներից մեկը նրան ասել է, որ եթե Հայաստանի դեմ պատերազմ սկսվի, ապա առաջինը նրան է սպանելու:
Դա վախեցրել էր Սևակին ու ինձ: Նրա մուսուլման զինծառայակիցները Սևակին շարունակ հիշեցրել են, որ նա հայ է, ինչի համար նա որակվել է թշնամի: Բոլոր ծառայակիցների համար Սևակը թշնամի էր»:
Հիշեցնենք, որ հրազենով Սևակին «անզգուշաբար» սպանած թուրք ազգայնական Քըվանչ Աղաօղլուն գտնվում է ազատության մեջ, քանի որ դատարանը նպատակահարմար է համարել նրան չառնել կալանքի տակ:
Ավելի վաղ Մելանի Քումրույանը հայտարարել է, որ սպանությունից մեկ ամիս առաջ զորամասում Սևակին սպառնացել են այրել. «Պարեկություն կատարելիս զինծառայողներից մեկը կորցրել է 50 թուրքական լիրա (ավելի քան 30 ամերիկյան դոլար), ինչի համար հրամանատարը մեղադրել է Սևակին ու նրա ընկերոջը և երկուսին ծեծի ենթարկել: Սևակը բողոքել էր հրամանատարի դեմ, սակայն սպառնալիքների ներքո հետ է վերցրել իր բողոքը: Նրան սպառնացել էին այրել»:
Ի դեպ, Սևակի զորացրվելուն մնացել էր ընդամենը 23 օր։ Սևակի սպանությունից հետո Թուրքիայում ի հայտ եկան նոր պաստառներ ու կարգախոսներ. 1,500,000+1+1 (1915 թվականին Հայոց ցեղասպանության ժամանակ զոհված 1.5 միլիոն հայերը, 2007 թվականի հունվարի 19-ին Ստամբուլի հայկական «Ակօս» թերթի նախկին խմբագրապետ Հրանտ Դինքը և 2011-ի ապրիլի 24-ին թուրքական բանակում սպանված Սևակ Բալըքչըն)։