Լեհաստանի նախկին նախագահ, Խաղաղության Նոբելյան մրցանակի դափնեկիր Լեխ Վալենսան խիստ բացասաբար է գնահատել Լեխ Կաչինսկու գործունեությունը երկրի ղեկավարի պաշտոնում:
«Մահացածների մասին վատ չեն խոսում, բայց դա (Լեխ Վալենսայի նախագահության տարիները.- 1in.am) դժբախտություն էր Լեհաստանի համար, և դա ավարտվեց դժբախտությամբ (նկատի ունի ավիավթարը.- 1in.am)»,- ասել է Վալենսան TVN24 հեռուստաալիքի եթերում: Նա նշել է, որ այդ ընթացքում «ոչ մի բան չի ստեղծվել, դրանք Լեհաստանի պատմության մեջ կորսված տարիներ էին»:
Վալենսայի խոսքերով՝ մի քանի տարի առաջ Լեհաստանում «կատարվեց ամենասասարսափելի բանը, որ երբևէ կարող էր կատարվել. դա եղբայրների համակարգն էր, երբ Լեխ Կաչինսկին նախագահ էր, իսկ նրա երկվորյակ եղբայրը՝ Յարոսլավ Կաչինսկին՝ վարչապետ»:
Վալենսան կարծիք է հայտնել, որ Կաչինսկու դեմ ահաբեկչության կամ մահափորձի տարբերակը շատ թույլ է: «Ո՞վ է Կաչինսկին: Սա այդ դարը չէ, և հարցերն այդպես չեն լուծվում, իսկ Լեհաստանն այնքան էլ կարևոր չէ այդպես վարվելու համար: Դա աբսուրդ է, դա լուրջ չէ: Կաչինսկին այն քաղաքական գործիչը չէր, ում դեմ պետք էր մահափորձ կատարել»,- ասել է նախկին նախագահը:
Նրա կարծիքով, ավիավթարի պատճառը եղել է պատասխանատու մարմիների անուշադրությունը և անփութությունը:
Հիշեցնենք. 2010 թ. ապրիլի 10-ին Սմոլենսկի մոտ վթարի ենթարկվեց Լեհաստանի նախագահ Լեխ Կաչինսկու օդանավը: Այդ ժամանակ զոհվեց 96 մարդ, այդ թվում՝ Կաչինսկին և նրա կինը, երկրի ղեկավարության մեծ մասը:
