Նյու-Յորքի Sotheby’s աճուրդի տանը մայիսի 9-ին կայանալիք ժամանակակից արվեստի գործերի վաճառքում կլինի Ֆրենսիս Բեկոնի «Գրող մարդու արտացոլանքը» կտավը: Bloomberg-ի փոխանցմամբ՝ 1976 թվականին արված կտավի վաճառքից կազմակերպիչները 40 միլիոն դոլարի ակնկալիք ունեն:
Այդ նկարը 1977 թվականից գտնվում էր մասնավոր հավաքածուում: Sotheby’s-ի ժամանակակից արվեստների բաժնի ներկայացուցիչ Տոբիաս Մայերը հայտնել է, որ անգլիացի էքսպրեսիոնիստի գործերը 2008 թվականից աճուրդում չեն եղել: Վերջին աճուրդի ժամանակ նրա «Տրիպտիխ» կտավը վաճառվել է նկարչի համար ռեկորդային՝ 86,2 միլիոն դոլարով: Նկարը գնել էր Ռոման Աբրամովիչը:
Ինչպես նշում է The Guardian-ը, «Գրող մարդու արտացոլանքը» նկարում պատկերված տղամարդը հիշեցնում է նկարչի սիրեկան Ջորջ Դայերին, որն ինքնասպան եղավ 1971-ին: Բեկոնը նրան պատկերել է իր մի շարք գործերում:
Նույն օրը աճուրդի տանը վաճառքի կհանվի Ռոյ Լիխտենշտեյնի «Քնած աղջիկը» նկարը, որը նույնպես 40 միլիոն դոլար է գնահատվում:
