ԱՄՆ-ը և Պարսից ծոցի 6 արաբական երկրները համաձայնության են եկել ստեղծել միասնական հակահրթիռային պաշտպանության համակարգ, որի նապտակն է «ազնիվ ազդանշան» ուղարկել Իրանին: Այս մասին հաղորդում է ITAR-TASS-ը՝ վկայակոչելով Բահրեյնի արտգործնախարար շեյխ Խալիդ Ահմադ Ալ-Խալիֆայի խոսքերը:
«ՀՀՊ-ն մեր համագործակցության հիմքն է,- ասել է նա:- Մենք համաձայնության ենք եկել ԱՄՆ-ի հետ քննարկել մանրամասները և մինչև հունիս վերջնական որոշում կայացնել»: Նախարարի խոսքերով՝ Վաշինգտոնի հետ խորհրդատվություն են անցկացնում Սաուդյան Արաբիան, ԱՄԷ-ն, Կատարը, Օմանը, Բահրեյնը, Քուվեյթը:
Խոսքը մասնավորապես վերաբերում է տարածաշրջանում միասնական ռադարային ցանց տեղակայելուն և տեղեկատվության փոխանակման համակարգ մշակելուն: «Փերիոթ» զենիթահրթիռային համալիրներն արդեն տեղակայված են Սաուդյան Արաբիայում և ԱՄԷ-ում: ՀՀՊ միասնական համակարգը նպատակ ունի առաջին հերթին հնարավոր հարվածից պաշտպանել նավթահանքերն ու նավթային տերմինալները:
«Մենք, բացի Իրանից, այլ սպառնալիք չունենք,- ասել է Բահրեյնի արտգործնախարաը:- Մեր պայմանավորվածությունը ազնիվ ազդանշան կլինի նրա համար»:
