«Ժառանգություն» կուսակցության պատգամավոր Անահիտ Բախշյանը, ով օրեր առաջ Երևանի թիվ 12 ընտրատարածքում ՀՀԿ-ի ու ԲՀԿ-ի կողմից բաժանվող ընտրակաշառքների կոնկրետ դեպքեր էր մատնանշել, և դրանց մասին ծանուցել դատախազությանը, նույն մարմնի կողմից կանչվել է լրացուցիչ պարզաբանումների, սակայն չի ներկայացել: Այս մասին «Առաջին լրատվական»-ին ասաց ինքը՝ պատգամավորը:
«Զանգեցին, ուզում էին ինձ հրավիրել բացատրություն վերցնելու, բայց ես ասացի, որ մամուլում հրապարակածից ավելին ասելու ոչինչ չունեմ: Ասացի, որ ընտրակաշառք բաժանելու փողոցը մատնանշել եմ, ընտրակաշառք բաժանող մարդու անունն ու մականունն ասել եմ, կաշառքի չափն ասել եմ և դատախազություն գնալու կարիք չունեմ: Հարցրեցին՝ բավարարվե՞նք հեռախոսազանգով, ասացի՝ բավարարվեք, գնացեք, հետևեք այդ մարդկանց»,- պատմեց Անահիտ Բախշյանը:
Հիշեցնենք, որ Շենգավիթ համայնքի թիվ 12 ընտրատարածքում առաջադրված «Ժառանգության» պատգամավոր Անահիտ Բախշյանն օրերս մամուլին ահազանգել էր, որ Մանանդյան փողոցում ոմն Արսեն, որի մականունն է «Այվազ», հանդես գալով ՀՀԿ անունից, 8 հազար դրամ է բաժանում քաղաքացիներին ` կուսակցությանը ձայն տալու համար: Նույն փողոցի ԲՀԿ գրասենյակում էլ Վոլոդյա անունով մեկը ԲՀԿ օգտին քվեարկելու համար 13 հազար դրամ է բաժանում:
Անահիտ Բախշյանի ձեռքն է ընկել նաև ՀՀԿ-ի մշակած այն հատուկ ցուցակի ձևը, որտեղ ապագա ընտրողից պահանջվում է լրացնել անձնագրի տվյալներ, հեռախոսահամար և այլն: Այդ թերթիկը, ըստ տիկին Բախշյանի, բաժանել են Շենգավիթի հանրակրթական դպրոցների ուսուցիչներին:
