Նախկին Հարավսլավիայի նախագահ և սերբ ընդդիմադիր դեմոկրատների առաջնորդ Վոիսլավ Կոշտունիցան մասնակցելու է Սերբիայի նախագահական ընտրություններին: Այս մասին հաղորդել է B92-ը:
Կոշտունիցան առաջադրվելու է Սերբիայի ընդդիմադիր դեմոկրատական կուսակցության կողմից: Կոշտունիցայի հիմնական գաղափարը Սերբիայի քաղաքական և ռազմական չեզոքությունն է: Նա հայտարարել է, որ նման դիրքորոշումը երկրին կօգնի ավելի լավ հարաբերություններ հաստատել Եվրամիության, Ռուսաստանի և ԱՄՆ-ի հետ:
Կոշտունիցայի խոսքերով` չեզոքության պահպանումը «Սերբիայի անկախության գաղափարի հոմանիշն է»: Քաղաքական գործիչը նաև հայտարարել է, որ իր հետ համամիտ է սերբերի մեծ մասը: Նա նաև ասել է, որ կտրականապես դեմ է Սերբիայի անդամակցությանը Եվրամիությանը, նաև՝ Սերբիայի կազմում Կոսովոյի պահպանմանը:
Սերբիայում նախագահական ընտրությունները նշանակվել են մայիսի 6-ին՝ այն բանից հետո, երբ հրաժարական տվեց երկրի նախագահ Բորիս Տադիչը, ով ևս մասնակցելու է ընտրություններին:
Կոշտունիցայի և Տադիչի հակառակորդներն ընտրություններում լինելու են սոցիալիստների առաջնորդ Իվիցա Դաչիչը և Սերբիայի առաջադեմ կուսակցության առաջնորդ Տոմիսլավ Նիկոլիչը:
