Վարչապետ, Հայաստանի Հանրապետական կուսակցության (ՀՀԿ) գործադիր մարմնի անդամ Տիգրան Սարգսյանը երեկ հանդիպել է ՀՀԿ անդամության հայտ ներկայացրած շուրջ 100 երիտասարդների հետ։
Վարչապետը հանդես է եկել դասախոսությամբ` «Քաղաքական գործիչների մարտահրավերները 21-րդ դարում» թեմայով։ Տիգրան Սարգսյանն առանձնացրել է երեք հիմնական դրույթ, որոնք ժամանակակից քաղաքական գործիչները պետք է հաշվի առնեն: «Առաջինն այն է, որ արագ փոփոխվող աշխարհն անսպասելի և անկանխատեսելի խնդիրներ է բացահայտում, և քաղաքական գործիչը պետք է պատրաստ լինի այդ մարտահրավերին։ Քաղաքական գործիչների համար դա ենթադրում է առանձնահատուկ կարողություններ` խորը գիտելիքներ, սովորելու մշտական ձգտում և սեփական գաղափարախոսության ու արժեքային համակարգի ձևավորում։ Երկրորդ կարևոր խնդիրն այն է, թե ժամանակակից քաղաքական գործիչն ինչպես է որոշում կայացնում, քանի որ որոշման կայացման մեթոդաբանությունն ունի ֆունդամենտալ նշանակություն։ Քաղաքական գործիչն ունենում է թիմ, որով փորձում է իրականացնել իր գաղափարախոսությունը, և որոշումները պետք է այնպես կայացվեն, որ քաղաքական գործչի թիմն զգա, որ ինքը նույնպես մասնակից է այդ որոշման կայացմանը։ Երրորդ դրույթն այն է, որ ժամանակակից աշխարհում պետությունները դասական իմաստով իրենց բազմաթիվ գործառույթներից կամովին հրաժարվում են` գիտակցելով, որ այդ գործառույթները պետք է իրականացնեն ոչ թե քաղաքական գործիչները, այլ մասնագիտացված կառույցները։ Դա նշանակում է, որ քաղաքական գործիչների ոլորտը և գործառույթների դաշտը 21-րդ դարում փոխվում է»,- նշել է վարչապետը։
Կառավարության ղեկավարը կարևորել է երիտասարդության քաղաքական ակտիվ մասնակցությունը` որպես «ՀՀ կադրային բանկի» առողջացման միջոց, խոսել ազգային-պահպանողական գաղափարախոսության արդիականության և ժամանակակից քաղաքական գործընթացներում ՀՀԿ ունեցած դերի կարևորության մասին։ Մասնավորապես, նա անդրադարձել է հիմնական գերակայություններին և արդի մարտահրավերներին, ընդգծել հայաստանյան ժամանակակից քաղաքական համակարգում, քաղաքական մտքի ձևավորման ու իրագործման գործընթացներում և գիտելիքահենք հասարակության կայացման գործում երիտասարդության դերի կարևորությունը։
Միջոցառման ավարտին ՀՀԿ գործադիր մարմնի անդամ Տիգրան Սարգսյանը կուսակցական տոմսեր է հանձնել ՀՀԿ անդամության հայտ ներկայացրած 100 երիտասարդներին։