Զաալֆելդի բնակիչ 76-ամյա Ֆոլկեր Քրաֆթը իր այգու խնձորենին զարդարել է տասնյակ հազարավոր ներկված հավկիթներով: Այս մասին տեղեկացնում է Associated Press-ը: Քրաֆթը Սուրբ Զատկի դեկորատիվ հավկիթների իր հավաքածուն սկսել է հավաքել 1965 թվականից: Սկզբում այն բաղկացած էր ընդամենը 18 հավկիթից:
Քրաֆթը որոշել է դադարեցնել հավաքածուի համալրումը, չնայած 2011-ին նրա մտադրություններն այլ էին: Այդ ժամանակ նրա հավաքածուում 9800 նմուշ կար: Դեկորատիվ հավկիթները պահելու համար նրա տանն այլևս տեղ չկա: “Եթե շարունակեմ հավկիթներ հավաքել, մի օր ստիպված կլինեմ դրանց հետ գիշերել”,- ասել է գերմանացի թոշակառուն:
Պատրաստվու՞մ է արդյոք Քրաֆթը դիմել Գինեսի ռեկորդների գրանցման հանձնաժողով, հայտնի չէ:
Այս տարի կաթոլիկները Սուրբ Զատիկը կնշեն ապրիլի 8-ին:
