Աթենքում անկարգություններ են սկսվել այն բանից հետո, երբ 77-ամյա թոշակառու Դիմիտրաս Խրիստոուլասը ինքնասպանություն է գործել` որպես բողոքի նշան թոշակների կրճատման դեմ: Այս մասին հայտնում է BBC News-ը:
Տղամարդը ինքնասպանութուն է գործել ապրիլի 4-ին Սինտագմա բազմամարդ հրապարակում:
Մահից առաջ նա գրություն է թողել, որտեղ մեղադրել է կառավարությանն այն բանի համար, որ ինքը հակաճգնաժամային ծրագրի շրջանակում թոշակի կրճատման հետևանքով մնացել է առանց գոյատևման միջոցների:
«Ես չեմ տեսնում կյանքս արժանապատիվ ավարտելու այլ ելք, որպեսզի ինքս ինձ ազատեմ աղբարկղերը փորփրելուց»,- գրել է Խրիստոուլասը:
Նույն օրը՝ երեկոյան, Հունաստանի խորհրդարանի դիմաց հավաքվել էր մի քանի հարյուր մարդ, որոնք հակամարտության մեջ են մտել ոստիկանության աշախատակիցների հետ` նրանց վրա նետել մոլոտովյան կոկտեյլներ: Ի պատասխան` ոստիկանները կիրառել են արցունքաբեր գազ: Տուժածների ու ձերբակալվածների մասին չի հաղորդվում:
Հունաստանի կառավարությունը բյուջետային ծախսերի հակաճգնաժամային ծրագիրն ընդունել էր 2012թ. փետրվարի 12-ին:
