Ռուսական Regnum լրատվական գործակալության փոխանցմամբ՝ թուրքական «Ձերբակալված լրագրողների համերաշխության հարթակ» կազմակերպությունը հրապարակել է 112 արհեստավարժ գրիչների անունները, որոնք Թուրքիայում սպանվել են 1909 թվականից ի վեր: Նրանց մեծ մասը հայեր ու քրդեր են:
Կազմակերպության մամլո քարտուղար Մեջաթի Աբայը հայտարարել է, որ Թուրքիայում սպանված առաջին լրագրողը Հասան Ֆահմին է, որը սպանվել է ապրիլի 6-ին, և այդ օրը նշվում է որպես «սպանված լրագրողների հիշատակի օր»: Աբայի խոսքերով՝ լրագրողների մեծ մասը սպանվել է 1970-1990-ական թվականներին.
«Հայ գրողների և լրագրողների մեծ մասը սպանվել է 1915 թվականին՝ Ցեղասպանության ժամանակ: 1915 թվականի ապրիլի 24-ին Կոստանդնուպոլսում ձերբակավում ու աքսորի է ուղարկվում հայ մտավորականության 220 ներկայացուցիչ, որոնցից 32-ը գրողներ ու լրագրողներ էին: Նրանք բոլորը սպանվում են:
Նրանց թվում էին Գրիգոր Զոհրապը, Սիամանթոն, Սարգիս Մինասյանը, Արմեն Դորյանը, Ռուբեն Զարդարյանը: Նրանց մեծ մասի գերեզմանների տեղը մնում է անհայտ: 2007 թվականի հունվարի 19-ին Ստամբուլում սպանվեց հայկական «Ակօս» թերթի գլխավոր խմբագիր Հրանտ Դինքը: Դրանով իսկ Թուրքիայում սպանված հայ լրագրողների թիվը հասավ 33-ի: Թուրքիայում սպանված յուրաքանչյուր երրորդ լրագրող էթնիկ հայ է: 1990-1994 թվականներին սպանվել են 18 քուրդ լրագրողներ»:
