Ամերիկյան իշխանություններն այսօր հայտարարել են այն մասին, որ մեղադրանք են ներկայացրել 2001 թ. սեպտեմբերի 11-ի ահաբեկչության ենթադրյալ կազմակերպչին` Հալեդ Շեյխ Մուհամմեդին և ևս չորս ահաբեկիչների: Ինչպես հայտարարել են ԱՄՆ պաշտպանության նախարարությունում, մեղադրանքում նշվում է, որ հինգ մեղադրյալները պատասխանատու են 2001 թ. սեպտեմբերի 11-ին Նյու Յորքում, Վաշինգտոնում և Շենքսվիլլեում իրականացված ահաբեկչությունների համար, որի հետևանքով մահացել է 2976 մարդ:
Եթե մեղադրյալներին մեղավոր ճանաչեն, նրանց մահապատիժ է սպառնում: Ինչպես մանրամասնում է Интерфакс-ը, այս գործը քննելու է ռազմական տրիբունալը: Բոլոր մեղադրյալները Գուանտանամոյի բանտի բանտարկյալներ են:
Պաշտոնական վարկածով` սեպտեմբերի 11-ի ահաբեկչությունն իրականցվել է «Ալ-Կաիդա»–ի կողմից:
Հիշեցնենք, որ ահաբեկիչները փախցրել էին 4 ինքնաթիռ, որոնցից երկուսը բախվել էին WTC աշտարակներին, մեկը ընկել էր Պենտագոնի վրա, իսկ չորրորդն ընկել էր Փենսիլվանիայի դաշտերից մեկում: Այս ամենի հետևանքով մահացել էին ԱՄՆ-ի և 91 այլ երկրների քաղաքացիներ: