Խորհրդարանի ընտրության մասնակից չորս քաղաքական ուժերի ներկայացուցիչներ՝ Հայ ազգային կոնգրես, Դաշնակցություն, Ժառանգություն և Բարգավաճ Հայաստան, ստորագրել են մի հայտարարություն, որով խոսում են ընտրությունների վերահսկման միասնական շտաբ ստեղծելու մասին:
Հայտարարությանը չի միացել միայն այդ համատեղ քննարկմանը մասնակցած ՀՀԿ-ն: Իհարկե, հայտարարությունը դեռ չի նշանակում միասնական շտաբի ստեղծում, քանի որ այդ շտաբի ստեղծման մասին համատեղ փաստաթուղթ, ինչպես ենթադրվում է, պետք է ստորագրեն քաղաքական ուժերի առաջնորդները: Կհասնի՞ արդյոք բանը դրան: Օրինակ, կստորագրի՞ արդյոք Գագիկ Ծառուկյանն այդպիսի հռչակագիր: Համատեղ հայտարարությունը, որ եղել է այսօր, ԲՀԿ-ից ստորագրել է Վարդան Օսկանյանը, բայց նրա և ԲՀԿ հարաբերություններում բավական լուրջ հարցեր կան: Օրինակ, Վարդան Օսկանյանը հայտարարում է, որ իշխող կոալիցիան ձևական է, իսկ ԲՀԿ-ն հայտարարում, որ դա Օսկանյանի անհատական քաղաքագիտական կարծիքն է: Այսինքն, դեռ պարզ չէ, թե Օսկանյանի ստորագրած համատեղ հայտարարությանը ինչպես է արձագանքելու ԲՀԿ-ն պաշտոնապես:
Ընտրությունների վերահսկման համատեղ շտաբի ստեղծումն իհարկե կարող է արդյունավետ քայլ լինել ընտրական գործընթացի համար, բայց խնդիրն այն է, թե այդ գաղափարին հավանություն տվող ուժերից ամեն մեկն իրականում ինչ հաշվարկներով է միանում դրան: Այսինքն, այդ շտաբն իսկապե՞ս իշխանության ընտրակեղծիքներին դիմագրավելու համար է լինելու, թե՞ լինելու է ընդամենը իշխանության հետ առևտրային առավել շահավետ մեկնարկային պայմաններ ապահովելու համար, երբ շտաբում ներգավված ուժերից ամեն մեկը միաժամանակ սեպարատ բանակցության մեջ կլինի իշխանության հետ:
Հայաստանի ընդդիմության պարագայում այդ հարցերը բավական հրատապ են, առավել ևս այն դեպքում, երբ համատեղ քայլերի մասին խոսելուն զուգահեռ, այդ ուժերը շարունակում են միմյանց հանդեպ կարծր քաղաքականությունն ու չեն փորձում մշակել ընտրությանը մասնակցելու համատեղ, օպտիմալ մի մարտավարություն, որը կօգնի չփոշիացնել ընտրազանգվածը: Միևնույն ժամանակ, ընտրությունների վերահսկման միասնական շտաբի մասին տեղեկատվությունից հետո բավական ուշագրավ հայտարարությամբ է հանդես եկել այդ գաղափարին միացող ուժերից մեկի՝ Հայ ազգային կոնգրեսի անդամ, Մարդու իրավունքներ 96 կուսակցության նախագահ Ռուբեն Թորոսյանը, ով հայտարարել է, որ դեմ են այդ շտաբին Կոնգրեսի միանալուն, քանի որ այնտեղ կա ԲՀԿ-ն, որը բացահայտորեն խախտում է ընտրական օրենսդրությունն ու բարեգործություն է կատարում:
Փաստորեն, միասնական շտաբի գաղափարը արդեն իսկ սպառնում է Հայ ազգային կոնգրեսի արդեն իսկ ընտրացուցակների պատճառով զգալիորեն խաթարված միասնականությանը: Այդպիսով, միասնական շտաբի գաղափարը ավելի շատ կարող է դառնալ Հայաստանում քաղաքական դաշտի ներքին բախումների, քան ընտրաեղծիքների դեմ պայքարի համախմբման դաշտ:
