«Ես վիրավորված եմ իմ հայ ժողովրդի համար»,- այսօր լրագրողների հետ հանդիպմանը հայտարարեց «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը` պարզաբանելով, որ օտարերկրյա ընկերությունները ՀՀ-ում մակերեսային հարցումներ են անցկացնում ու ներկայացնում որպես իրողություն:
Ա. Ադիբեկյանի վրդովմունքը հարուցել է ԱՄՆ դեսպան Ջոն Հեֆերնի վերջերս արած հայտարարությունը, թե՝ ՀՀ-ում ընտրողների միայն 12%-ն է հավատում արդար ընտրություններին, և դեսպանը զարմանք էր արտահայտել, թե այս պայմաններում մարդիկ ինչպես կարող են գնալ ընտրությունների:
«Այնպիսի ազգ ենք, որ չհավատալով արդար ընտրությունների՝ գնում ենք ընտրության»,- ասաց Ադիբեկյանը` հայտարարելով, որ ԱՄՆ ազգային դեմոգրաֆիական ինստիտուտի այդ գնահատականը արված է կոպիտ ու կոշտ հետազոտության հիման վրա, իրականությունը չեն արտացոլում նաև «Գելափ» ու աշխարհում հայտնի մյուս սոցիոլոգիական կազմակերպությունների ուսումնասիրությունները, և ԽՍՀՄ տարածքում միակ ճիշտն իր կենտրոնն է։
«Պարոն Հեֆերնը պետք է հանգիստ լինի: Մենք գիտենք՝ ինչի համար ենք գնում ընտրության. կա՛մ Հեֆերնը պետք է ներողություն խնդրի հայ ազգին վիրավորելու համար, կա՛մ պետք է պատժի իրեն սխալ տեղեկություն տվողին»,- կարծում է Ադիբեկյանը:
Ըստ սոցիոլոգի` ընտրողների միայն 70%-ն է մտադիր գնալ ընտրությունների, և նրանք բաժանվում են 3 խմբի` լուրջ խախտումներով ընտրություններ ակնկալողներ` 40%, թեթև խախտումներով ընտրություններ ակնկալողներ` 36.6%, արդար և համեմատաբար արդար ընտրություններ ակնկալողներ` 17%: Սոցիոլոգի գնահատականով` հարցվածների կեսից ավելին ընտրությունների անցկացման որակը բավարար է գնահատում:
«Մենք շիզոֆրենիկ չենք, նորմալ ազգ ենք: Մեր կարծիքով՝ ընտրությունների մասնակիցների 2/3-ը կարծում է, որ իր ձայնը տեղ կհասնի»,- նշեց Ադիբեկյանը` միաժամանակ անհնար համարելով, որ բոլոր ընտրողները կաշառք են վերցնում:
«Առաջին լրատվական»-ի հարցին` ինչպե՞ս կմեկնաբանեք, որ մարդահամարի արդյունքներով՝ ՀՀ-ում բնակչության թիվը մոտ 2.8 մլն է, իսկ ընտրողների թիվը հրապարակվեց 2.5 մլն, Ա. Ադիբեկյանը պատասխանեց՝ ընտրացուցակներում են նաև արտագնա աշխատանքի մեկնածները, իսկ ռեալ ընտրողների թիվը 1.2-1.4 մլն է:
