Երեկ Մոսկվայի շուկաներից մեկում տեղի ունեցած հրդեհի գործով ձերբակալվել է երկրորդ կասկածյալը՝ Սեդրակ Ստեփանյանը: Այս մասին հաղորդում է RIA Novosti-ն՝ վկայակոչելով Մոսկվայի հարցերով Ռուսաստանի քննչական կոմիտեի գլխավոր քննչական վարչության պաշտոնական ներկայացուցիչ Վիկտորյա Ցիպլյոնկովային:
«Մայրաքաղաքի ոստիկանության աշխատակիցների գործողությունների արդյունքում ձերբակալվել է հրդեհի գործով ևս մեկ կասկածյալ՝ Սեդրակ Ստեփանյանը: Նա «Ալբասետ» ՍՊԸ-ի փաստացի սեփականատերն է, որը վարձակալել և շահագործել է այն պահեստը, որում հրդեհ է տեղի ունեցել: Նա նաև կազմակերպել է անօրինական ներգաղթյալների աշխատանքները»,- ասել է Ցիպլյոնկովան:
Այս պահին քննիչները հարցաքննում են նրան որպես կասկածյալի, որոշվում է նրա խափանման միջոցը:
Ավելի վաղ նույն գործով ձերբակալվել էր շենքի սեփականատեր Վլադիմիր Լիկովը:
Հիշեցնենք. հրդեհը տեղի է ունեցել երեքշաբթի՝ ժամը 04:50-ի սահմաններում, Կաչալովի շուկայում: Կրակը բռնկվել է շուկայի կողքի կառույցում, որտեղ ապրում էին անօրինական ներգաղթյալներ: Հրդեհի հետևանքով զոհվել է 17 մարդ, ոչ պաշտոնական տվյալներով՝ տաջիկներ:
