ԱՄՆ Ինդիանա նահանգում Դեմոկրատական կուսակցության 4 անդամների մեղադրանք է ներկայացվել 2008 թ. նախագահական պրայմերիզի ժամանակ նրանց կատարած խարդախությունների համար:
Ինչպես հաղորդում է Fox News-ը, մեղադրող կողմը պնդում է, որ Բուտչ Մորգանը, Փեմ Բրյունեթը, Բևերլի Շելթոնը և Դասթին Բլիթը ներգրավված են եղել այդ նահանգում պրայմերիզին մասնակցելու համար անհրաժեշտ ստորագրությունների կեղծումներում:
Մեղադրանքի մեջ նշվում է, որ ստորագրությունների հետ կապված խարդախությունները տեղի են ունեցել Սենթ Ջոզեֆ շրջանում՝ Մորգանի կարգադրությամբ, որը դեմոկրատների տեղի բաժանմունքի նախագահն էր: 2011 թ. հոկտեմբերին, երբ հայտնի դարձավ նրա կեղծումների մասին, նա հրաժարական տվեց:
Որպեսզի իրենց անունները պրայմերիզի օրը քվեաթերթիկներում հայտնվեն, քաղաքական գործիչներին անհրաժեշտ էր նահանգի 10 ընտրական շրջաններից յուրաքանչյուրից հավաքել առնվազն 500 ստորագրություն: Այդ ստորագրությունները հավաքելու փոխարեն Սենթ Ջոզեֆի շրջանում դեմոկրատների բաժանմունքի անդամները կեղծել են դրանք:
Հետաքննության ընթացքում պարզվել է, որ 2008 թ. հունվարից սկսած՝ ստորագրություններ են կեղծվել հօգուտ Բարաք Օբամայի, Հիլարի Քլինթոնի և Ջոն Էդվարդսի: Ընտրողների մասին տվյալները և նրանց ստորագրությունները վերցվել են հին փաստաթղթերից:
Պաշտոնական տվյալների համաձայն՝ Օբամայի առաջադրման համար Սենթ Ջոզեֆ շրջանում հավաքվել է 534 ստորագրություն, Քլինթոի համար՝ 704: Զանգվածային կեղծումների վերաբերյալ հստակ տեղեկություն չկա: Իշխանությունների տվյալներով՝ ընդհանուր առմամբ կեղծվել է ընդամենը 20 ստորագրություն, սակայն ավելի վաղ մամուլում լուրեր էին տարածվել, որ դրանց թիվը 150 է:
Եթե պրայմերիզում պարզվեր, որ Օբաման կամ Քլինթոնն այդ շրջանում չեն հավաքել անհրաժեշտ 500 ստորագրությունները, նրանք կարող էին դուրս մնալ Ինդիանայի նախընտրական պայքարից:
