Այս պահին Մաշտոցի պուրակում հանդարտ է: Ոստիկանության աշխատակիցները շարունակում են պահպանել պուրակում տեղադրված կրպակները, իսկ պուրակի մեծ ծածկի տակ իրենց ամենօրյա առօրյան են շարունակում քաղաքացիական նախաձեռնության անդամները, երիտասարդ ակտիվիստները և բնապահպանները:
Ինչպես «Առաջին լրատվական»-ին տեղեկացրեց ապամոնտաժող բրիգադի անդամ Օշին Եղիազարյանը՝ այսօր, ժամը 17.00-ին, ապամոնտաժող բրիգադի անդամները և հասարակական կազմակերպությունների շուրջ 30-ից ավելի ներկայացուցիչներ հանդիպում են ունենալու և որոշելու են իրենց հետագա գործողություններն ու անելիքները:
Նա նշեց, որ բազմիցս է ասել և կասի՝ ցանկացած որոշման դեպքում իրենց գործողությունները լինելու են օրինականության շրջանակում. «Եթե նույնիսկ ոստիկանները ապամոնտաժման աշխատանքների ժամանակ փորձեն մեզ ծեծի ենթարկել, մենք վեր կպարզենք մեր ձեռքերը և չենք ընդդիմանա»,-պարզաբանեց բրիգադի անդամը` հավելելով, որ բրիգադը հաստատակամ է և ամենայն հավանականությամբ շարունակելու է ապամոնտաժման փորձերը:
Հիշեցնենք, որ ապամոնտաժող բրիգադի անդամները հայտարարություն են տարածել, որում տեղեկացնում են, որ այսօր, ժամը 13.00-ը քաղաքային իշխանություններին ուղղված վերջնաժամկետն է:
